زەينەتكەرلەردىڭ نەسيەسى كەشىرىلە مە - ۇكىمەت جاۋابى
استانا. KAZINFORM - ناۋرىز ايىنىڭ باسىندا ءماجىلىس دەپۋتاتتارى پرەمەر-ءمينيستردىڭ ورىنباسارى ەرمەك كوشەربايەۆتىڭ اتىنا زەينەتاقى تولەمدەرىن زاڭنامادان «كىرىس كوزى» رەتىندە الىپ تاستاپ، زەينەتكەرلەردىڭ قارىزىن كەشىرۋ كەرەكتىگى تۋرالى ساۋال جولداعان بولاتىن.
ۆيتسە-پرەمەردىڭ جاۋابىندا زەينەتكەرلەر دە كەز كەلگەن قازاقستان ازاماتى سياقتى جەكە تۇلعانىڭ سوتتان تىس بانكروتتىعى ارقىلى قارىز پروبلەماسىن رەتتەي الاتىنى جانە اتالعان تەتىكتى جەتىلدىرەتىن جاڭا نورمالار ازىرلەنىپ جاتقانى ايتىلعان.
- زاڭ بويىنشا مەملەكەتتىك بيۋدجەتتەن جانە مەملەكەتتىك الەۋمەتتىك ساقتاندىرۋ قورىنان تولەنەتىن جاردەماقىلار مەن الەۋمەتتىك تولەمدەردى اۋدارۋعا ارنالعان بانك شوتتارىنداعى اقشانى ءۇشىنشى تۇلعالاردىڭ ءوندىرىپ الۋىنان مەملەكەت قورعايدى. زەينەتاقى اتالعان تولەم تۇرلەرىنە جاتقىزىلماعان. الەۋمەتتىك كودەكستىڭ 203-بابىنا سايكەس زەينەتاقىدان ۇستاپ قالۋ اتقارۋشىلىق ءىس جۇرگىزۋ تارتىبىمەن جۇرگىزىلۋى مۇمكىن. ءبىراق زەينەتاقىدان ۇستاپ قالۋ تولەمى 50 پايىزدان اسپاۋ كەرەك، - دەپ تۇسىندىرەدى ەرمەك كوشەربايەۆ.
دەپۋتاتتاردىڭ ۇسىنىسىن ۇلتتىق بانكتەگىلەر دە قولداماسا كەرەك.
- ۇلتتىق بانكتىڭ ۇستانىمى بويىنشا، ەگەر زەينەتاقى تولەمدەرىن ءۇشىنشى تۇلعالاردىڭ ءوندىرىپ الۋىنان تولىق قورعاۋ ەنگىزىلسە، وندا زەينەتكەرلەرگە بەرىلەتىن نەسيەلەردىڭ قايتارىلۋىن قامتاماسىز ەتۋى قيىنعا سوعۋى ىقتيمال. وسىلايشا بانكتەر ءوز كەزەگىندە اتالعان ساناتتاعى ازاماتتارعا نەسيە بەرۋدى قاتاڭداتۋى نەمەسە ونى توقتاتۋدى قاراستىرۋى مۇمكىن. بۇل وسى بانك ءونىمىن پايدالاناتىن زەينەتكەرلەر اراسىندا كەلىسپەۋشىلىك تۋعىزادى. جەكەلەگەن ساناتتاعى ازاماتتاردىڭ قارىزىن كەشىرۋ بارلىق قارىز الۋشىلاردىڭ، ونىڭ ىشىندە تولەۋ قابىلەتى بار ازاماتتاردىڭ اراسىندا ماسىلدىقتىڭ وسۋىنە جانە كرەديتتىك تارتىبىنە تەرىس اسەر ەتىپ، ءوز كەزەگىندە قارجى نارىعى ءۇشىن جۇيەلى تاۋەكەلدەردىڭ پايدا بولۋىنا اكەپ سوعۋى مۇمكىن، - دەپ جازىلعان جاۋاپتا.
بۇعان دەيىن بانك الدىنداعى بورىشى 2,1 ميلليارد تەڭگەگە جەتكەن استانالىق تۇرعىن بانكروتتىق راسىمدەي الماي جۇرگەنىن جازعان ەدىك.
