زەينەتاقى، جالاقى، شاكىرتاقى ءوستى. بيىل ۇكىمەت ماقساتىنا جەتتى مە؟

ناتيجە قانداي؟ مينيسترلەر كابينەتى جوسپارىن تولىق ورىندادى ما؟ Massaget.kz ءتىلشىسى شولۋ جاسادى.

زەينەتاقى بويىنشا

بيىل 1-قاڭتاردان باستاپ زەينەتاقىعا قاتىستى مىناداي وزگەرىس بولدى:

بازالىق زەينەتاقى 7 پايىزعا ءوستى؛

ىنتىماقتى زەينەتاقى 9 پايىزعا ءوستى.

وسىلايشا 2,4 ميلليون زەينەتكەردىڭ، سونىڭ ىشىندە بجزق جيناقتاۋ قورىنان زەينەتاقى الاتىن 459,3 مىڭ زەينەتكەردىڭ زەينەتاقىسى كوبەيدى.

ورتاشا زەينەتاقى كولەمى 165 مىڭ تەڭگەدەن استى. سونداي-اق، ۇكىمەت جۇمىس بەرۋشى تولەيتىن مىندەتتى زەينەتاقى جارناسى 2028-جىلعا قاراي 5 پايىزعا ۇلعايادى دەپ سەندىردى.

ەڭ تومەنگى جالاقى بويىنشا

بيىل 1-قاڭتاردان باستاپ ەڭ تومەنگى جالاقى 85 مىڭ تەڭگەگە دەيىن ارتتى. ياعني 1,8 ميلليون ادام، ونىڭ ىشىندە بيۋجەت قىزمەتكەرلەرى قامتىلدى.

600 مىڭ ازاماتتىق قىزمەتكەردىڭ جالاقىسى بىرتىندەپ 20 پايىزعا كوتەرىلىپ جاتىر.

جۇمىسپەن قامتۋ بويىنشا

ۇكىمەتتىڭ ەسەبىنە سۇيەنسەك، 845 مىڭنان اسا ادام جۇمىسپەن قامتىلعان. سونىڭ ىشىندە 401 مىڭنان استامى - جاستار.

9 مىڭعا جۋىق ازامات، سونىڭ ىشىندە مۇگەدەكتىگى بار جاندار جانە ەرەكشە قاجەتتىلىگى بار بالا تاربيەلەپ وتىرعان اتا-انالار بيزنەس يدەياعا گرانت العان.

«ۇلتتىق قور – بالالارعا» جوباسى بويىنشا

بيىلدان باستاپ «ۇلتتىق قور – بالالارعا» باعدارلاماسى ىسكە قوسىلدى. ۇلتتىق قوردىڭ جىل سايىنعى ينۆەستيتسيالىق كىرىسىنىڭ 50 پايىزى 18 جاسقا دەيىنگى بالالاردىڭ ارنايى جيناق شوتتارىنا اۋدارىلادى، الايدا ونى مەرزىمىنەن بۇرىن الۋعا بولمايدى.

ايتا كەتەيىك، بۇل قازاقستان ازاماتتىعى بار، 18 جاسقا دەيىنگى بارلىق بالاعا ارنالعان.

«2024-جىلعى 1-اقپاننان باستاپ تولەم باستالدى. 2024-جىلى باعدارلاما قاتىسۋشىلارىنىڭ شوتتارىنا $695,5 ميلليون تولەندى»، - دەپ جازىلعان ۇكىمەتتىڭ ەسەبىندە.

$30,6 ميلليون 2024-جىلى 18 جاسقا تولعان نەمەسە تولاتىن بالالارعا تولەنبەك. قازىر ۋاكىلەتتى وپەراتورلار ارقىلى $3,4 ميلليون سوماسىنا 33,5 مىڭنان اسا ءوتىنىمنىڭ قاراجاتى بانك شوتتارىنا اۋدارىلعان.

«$1,8 ميلليون سوماسىنا 18 مىڭعا جۋىق ءوتىنىم تۇرعىن ءۇي جاعدايىن جاقسارتۋعا باعىتتالسا، $1,6 ميلليون سوماسىنا 15,5 مىڭ ءوتىنىم ءبىلىم الۋ ءۇشىن تولەندى»، - دەپ جازىلعان ەسەپتە.

باسپانا ماسەلەسى

ۇكىمەتتىڭ جوسپارىنا سايكەس 7 جىل ىشىندە قازاقستاندا 111 ميلليون شارشى مەتر تۇرعىن ءۇي سالىنۋى كەرەك. 2024-جىلى تۇرعىن ءۇي قۇرىلىسى 18 ميلليون شارشى مەترگە جەتەدى. بيىلعى جوسپار بويىنشا 1 ميلليوننان اسا وتباسى باسپانامەن قامتىلادى.

«قاڭتار-قازان ارالىعىندا 14 ميلليون شارشى مەتر تۇرعىن ءۇي نەمەسە 123,8 پاتەر مەن ءۇي پايدالانۋعا بەرىلدى»، - دەپ جازىلعان ۇكىمەت حابارلاماسىندا.

دەنساۋلىق ساقتاۋ سالاسى

ۇكىمەتتىڭ «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 655 باستاپقى مەديتسينالىق-سانيتارلىق كومەك كورسەتۋ جوسپارلانعان: 257 مەديتسينالىق پۋنكت، 238 فەلدشەرلىك پۋنكت جانە 160 دارىگەرلىك امبۋلاتوريا.

ەسەپكە سۇيەنسەك، 251 نىسان قۇرىلىسى اياقتالعان، 1 مىڭنان اسا جۇمىس ورنى اشىلعان. سونداي-اق، جاڭا دەنساۋلىق ساقتاۋ نىساندارىنا قاراجات بولىنگەن.

انا ءولىمى ازايدى ما؟

قازاقستانداعى الەۋمەتتىك ساياساتتىڭ باستى مىندەتتەرىنىڭ ءبىرى - انا ءولىمىن ازايتۋ. ۇكىمەت مالىمەتىنشە، 2024-جىلعى كورسەتكىشتەر بىلتىرمەن سالىستىرعاندا 15 پايىزعا جاقسارعان.

ۇكىمەت بۇعان جاڭا باعدارلامالاردىڭ ەنگىزىلۋى، كلينيكالىق حاتتامالاردى قايتا قاراۋ، بوسانۋعا تاريفتەردى ارتتىرۋ اسەر ەتكەنىن حابارلادى. بيىل امبۋلاتوريالىق دەڭگەيدە 212,8 ميلليارد تەڭگەگە 3,5 ميلليون پاتسيەنت ءدارى-دارمەكپەن قامتاماسىز ەتىلگەن.

ءبىلىم بەرۋ سالاسى، جايلى مەكتەپ بويىنشا

قازاقستاندا «جايلى مەكتەپ» ۇلتتىق جوباسى جۇزەگە اسىرىلىپ جاتىر. ۇكىمەت مالىمەتىنشە، جاڭا مەكتەپتەردىڭ 40 پايىزدان استامى اۋىلدىق جەرلەردە سالىنعان.

«بارلىعى 36 جاڭا جايلى مەكتەپ پايدالانۋعا بەرىلدى، ونىڭ 15 ءى اۋىلدىق ەلدى مەكەندەردە سالىندى. 31-جەلتوقسانعا دەيىن 76 نىسان ەسىگىن ايقارا اشادى»، - دەپ ەسەپ بەردى ۇكىمەت.

بالاباقشالار بويىنشا

قازاقستاندا 11,6 مىڭ مەكتەپكە دەيىنگى ۇيىم جۇمىس ىستەيدى، وندا 988 مىڭنان اسا بالا تاربيەلەنىپ جاتىر، مەكتەپتەردە مەكتەپالدى دايارلىقپەن 160 مىڭ بالا قامتىلعان.

«بالالاردى قامتۋ دەڭگەيى 92,5 پايىزعا جەتتى، 62,3 مىڭ ورىندىق 547 جاڭا بالاباقشا اشىلدى. مەكتەپكە دەيىنگى ۇيىمداردا 4,2 مىڭنان اسا كونسۋلتاتسيا پۋنكتى جۇمىس ىستەيدى»، - دەپ جازىلعان حابارلامادا.

شاكىرتاقى بويىنشا

قازاقستاندا 2020-جىلدان باستاپ ستۋدەنتتەردىڭ شاكىرتاقىسى كوبەيىپ جاتىر. ۇكىمەتتىڭ جوسپارى بويىنشا 2025-جىلعا قاراي ستۋدەنتتەردىڭ شاكىرتاقىسى 2 ەسە، ماگيسترانتتار مەن دوكتورانتتاردىڭ شاكىرتاقىسى 1,75 ەسە كوبەيەدى.

بيىلعى ناتيجە مىناداي:

باكالاۆريات ستۋدەنتتەرىنىڭ شاكىرتاقىسى 20 پايىزعا، 47135 تەڭگەگە دەيىن؛

پەداگوگيكالىق جانە مەديتسينالىق باعىتتاعى ستۋدەنتتەر ءۇشىن 75600 تەڭگەگە دەيىن ءوستى.

ينتەرندەردىڭ ستيپەندياسى - 85376 تەڭگە؛ رەزيدەنتتەردىڭ ستيپەندياسى - 123122 تەڭگە.

ماگيسترانتتاردىڭ ستيپەندياسى 15 پايىزعا، 107061 تەڭگەگە دەيىن؛

دوكتورانتتاردىڭ ستيپەندياسى 240000 تەڭگەگە دەيىن كوبەيدى.

سونىمەن قاتار، «جاس عالىم» جوباسى اياسىندا 2021-2024-جىلدار ارالىعىندا جاس عالىمدار 2 مىڭنان اسا عىلىمي جوبانى جۇزەگە اسىرعان. ەندى 2025-2027-جىلدارعا ارنالعان جاڭا كونكۋرس جاريالاندى.

ەسكە سالايىق، بۇعان دەيىن ۇكىمەتتىڭ الداعى جىلدارعا جوسپارى تۋرالى جازدىق. 2025-جىلعا الەۋمەتتىك تولەمدەرگە 6 تريلليون تەڭگە سوماسىندا قارجى قاراستىرىلعان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى