زياندى ەڭبەك جاعدايلارىندا جۇمىس ىستەيتىندەرگە ارنايى الەۋمەتتىك تولەم جاسالادى

ا. سارباسوۆتىڭ سوزىنە قاراعاندا، مەملەكەت باسشىسى 2023-جىلعى 1- قىركۇيەكتەگى قازاقستان حالقىنا جولداۋىندا ايتقان تاپسىرمانى ورىنداۋ ماقساتىندا ءتيىستى ۇسىنىستار ەنگىزىلدى. بۇل تۇرعىدا ەڭبەك جانە حالىقتى الەۋمەتتىك قورعاۋ مينيسترلىگى زياندى ەڭبەك جاعدايلارىندا جۇمىس ىستەيتىن ادامداردى الەۋمەتتىك قورعاۋ دەڭگەيىن ارتتىرۋدى كوزدەيتىن زاڭناماعا تۇزەتۋلەر ازىرلەپ، ونى مۇددەلى مەملەكەتتىك ورگاندارمەن كەلىسىپ، ءماجىلىستىڭ قاراۋىنا جىبەردى.

«زاڭنامالىق تۇزەتۋلەردىڭ نەگىزگى ماقساتى - زياندى ەڭبەك جاعدايلارىندا جۇمىس ىستەيتىن جۇمىسكەرلەرگە ارنايى الەۋمەتتىك تولەم ەنگىزۋ، جۇمىسكەردىڭ ەڭبەك مىندەتتەرىن ورىنداۋ كەزىندە جازاتايىم وقيعالاردان مىندەتتى الەۋمەتتىك ساقتاندىرۋ جۇيەسىن جەتىلدىرۋ»، - دەدى ۆيتسە-مينيستر.

ونىڭ ايتۋىنشا، وسى شارالاردى ىسكە اسىرۋ ءۇشىن ازاماتتىق، ەڭبەك، الەۋمەتتىك كودەكستەرگە جانە «قىزمەتكەردى ەڭبەك (قىزمەتتىك) مىندەتتەرىن اتقارۋ كەزىندە جازاتايىم وقيعالاردان مىندەتتى ساقتاندىرۋ تۋرالى» زاڭعا تۇزەتۋلەر ەنگىزۋ قاراستىرىلعان.

ا. سارباسوۆ 2014-جىلدان باستاپ زياندى ەڭبەك جاعدايلارىندا جۇمىس ىستەيتىن ادامدار ءۇشىن جۇمىس بەرۋشىلەر ەسەبىنەن جالاقىنىڭ %5 مولشەرىندە مىندەتتى كاسىپتىك زەينەتاقى جارنالارى تولەنەتىنىن حابارلادى. سونداي-اق ولارعا زەينەتاقى جيناقتارى جەتكىلىكتى بولعان كەزدە زەينەتكە ەرتە شىعۋ قۇقىعى بەرىلەدى: ەرلەر ءۇشىن - 5,3 ميلليون تەڭگە، ايەلدەر ءۇشىن - 6,8 ميلليون تەڭگە.

ارنايى الەۋمەتتىك تولەم بىرنەشە كومپونەنتتەن تۇرادى جانە ءتورت باعىتتى قامتيدى. بىرىنشىدەن، رەسپۋبليكالىق بيۋجەتتەن 1,5 ەڭ تومەن كۇنكورىس دەڭگەيى مولشەرىندە ارنايى كاسىپتىك تولەم بار. ەكىنشىدەن، ب ج ز ق- دان مىندەتتى كاسىپتىك زەينەتاقى جارنالارى مەن جيناقتالعان زەينەتاقى جيناقتارىن ەسكەرە وتىرىپ، مىندەتتى زەينەتاقى جارنالارى ەسەبىنەن دە ىسكە اسىرىلادى. ۇشىنشىدەن، ءومىردى ساقتاندىرۋ جونىندەگى كومپانيالاردان 1 ەڭ تومەن كۇنكورىس دەڭگەيى مولشەرىندە ەسكەرىلەدى. تورتىنشىدەن، جۇمىس بەرۋشىلەردىڭ قاراجاتى ەسەبىنەن 1 ەڭ تومەن كۇنكورىس مولشەرىندە جۇزەگە اسىرىلادى.

ءاقمادي سارباسوۆ ارنايى الەۋمەتتىك تولەمدەردى ەنگىزۋ مەملەكەتتىڭ، جۇمىس بەرۋشىنىڭ جانە جۇمىسكەردىڭ ورتاق جاۋاپكەرشىلىگىن قامتاماسىز ەتەتىنىن جانە زياندى ەڭبەك جاعدايلارىندا جۇمىس ىستەيتىن ادامداردىڭ الەۋمەتتىك قورعالۋ دەڭگەيىن ارتتىرۋعا مۇمكىندىك بەرەتىنىن اتاپ ءوتتى.

ەسكە سالساق، مەملەكەت باسشىسى بيىلعى جولداۋىندا زياندى ەڭبەك جاعدايىندا جۇمىس ىستەپ جۇرگەن قازاقستاندىقتاردى 55 جاستان باستاپ ارناۋلى الەۋمەتتىك تولەمدى ەنگىزۋ بويىنشا ۇكىمەتكە تاپسىرما بەرگەن ەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى