زووباق پەن كوشپەلى سيرك قىزمەتىنە تىيىم سالىندى: قازىر جانۋارلار قايدا

ەسكە سالايىق، بىلتىر جەلتوقساندا ۇكىمەت وتىرىسىنان كەيىن وتكەن باسپا ءسوز ءماسليحاتىندا ەكولوگيا جانە تابيعي رەسۋرستار ءمينيسترى ەرلان نىسانبايەۆ بيىل 1- قاڭتاردان باستاپ قازاقستاندا كوشپەلى سيركتەر مەن زووباقتارعا تىيىم سالىناتىنىن ءمالىم ەتتى.

وسىلايشا قازاقستان رەسپۋبليكاسىنىڭ «جانۋارلارعا جاۋاپكەرشىلىكپەن قاراۋ تۋرالى» 2021 -جىلعى 30 -جەلتوقسانداعى № 97-VII زاڭىنىڭ 18-بابىنىڭ 6-تارماعىنا سايكەس 2025 -جىلعى 1-قاڭتاردان باستاپ كوشپەلى تسيركتەر قىزمەتىنە تىيىم سالىندى.

قازىر جانۋارلار قايدا؟

- كورسەتىلگەن مەرزىمدە قىزمەتىن توقتاتپاعان جانە قۇجاتتارىن زاڭ تالاپتارىنا سايكەس كەلتىرمەگەن جاعدايدا ماسەلە جەرگىلىكتى اتقارۋشى ورگانداردىڭ ءوتىنىشى بويىنشا سوت تارتىبىمەن تاراتىلادى. زاڭنىڭ 4-بابىنىڭ 3-تارماعىنا سايكەس ەگەر جانۋاردى نىسانالى ماقساتى بويىنشا ودان ءارى پايدالانۋ مۇمكىن بولماسا، جانۋاردىڭ يەسى نەمەسە جاۋاپتى ادام جانۋاردى وزدىگىنەن ولگەنگە دەيىن باعۋدى قامتاماسىز ەتۋگە نەمەسە جانۋارلارعا ارنالعان پاناجايعا، قاجەتتى جاعدايلار جاساي الاتىن جەكە نەمەسە زاڭدى تۇلعالارعا بەرۋگە مىندەتتى، - دەگەن جاۋاپ الدىق ەكولوگيا جانە تابيعي رەسۋرستار مينيسترلىگىنەن.

دەگەنمەن، مينيسترلىك 1-قاڭتاردا كۇشىنە ەنگەن تىيىمدى بۇزعان جاعدايدا، حايۋاناتتار باعى مەن كوشپەلى سيركتەر قىزمەتىنە اكىمشىلىك نەمەسە قىلمىستىق جاۋاپكەرشىلىك قاراستىرىلماعانىن ايتىپ وتىر.

سونداي-اق قولدانىستاعى زاڭناماعا سايكەس حايۋاناتتار باعى مەن جانۋارلاردى قولداناتىن كوشپەلى سيرك كاسىبىنە مەملەكەتتىك قولداۋ قاراستىرىلماعان. ودان بولەك، ەكولوگيا مينيسترلىگى ەل اۋماعىندا قانشا حايۋاناتتار باعى مەن كوشپەلى سيركتەر بارىنا ساناق جۇرگىزبەيتىن بولىپ شىقتى.

مينيسترلىك زاڭمەن سالىنعان تىيىمدى قالاي باقىلاپ وتىر

- «جانۋارلارعا جاۋاپكەرشىلىكپەن قاراۋ تۋرالى» زاڭنىڭ 27-بابىنا سايكەس قوعامدىق ينسپەكتورلار جانە جارعىسىندا جانۋارلارعا جاۋاپكەرشىلىكپەن قاراۋ سالاسىندا قوعامدىق باقىلاۋ جۇرگىزۋ جونىندەگى قىزمەتتى ۇسىناتىن كوممەرتسيالىق ەمەس ۇيىمدار قازاقستان رەسپۋبليكاسىنىڭ زاڭناماسىنا سايكەس جۇزەگە اسىرادى. جانۋارلارعا جاۋاپكەرشىلىكپەن قاراۋ سالاسىنداعى قوعامدىق باقىلاۋ ەرىكتى جانە وتەۋسىز نەگىزدە جۇزەگە اسىرىلادى، - دەلىنگەن رەسمي ساۋال جاۋابىندا.

ەسكە سالايىق، ەلىمىزدىڭ بىرنەشە وڭىرىندە جانۋارلاردى ۇستاۋعا قاتىستى شۋ شىققان ەدى. وتكەن جىلى اقشاعا قۇنىعىپ، اڭداردى ازاپتاعان اقتاۋداعى جىلجىمالى زووباققا تەكسەرىس جۇرگىزىلدى.

سونداي-اق، قاراعاندىدا زووباق قىزمەتكەرلەرى ارىستاننىڭ ەكى كۇشىگىن ساتپاق بولعان ارەكەتى تۋرالى جازعان ەدىك.

ودان بولەك، 2019 -جىلى الماتىدا جانۋارلاردىڭ ولىمىنەن سوڭ زووباق قىزمەتكەرلەرى جۇمىستان قۋىلدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى