زەلەنسكي رەسەيمەن كەلىسسوزدەر جۇرگىزۋ ءۇشىن ءوز شارتتارىن اتادى
استانا. قازاقپارات – ۋكراينا پرەزيدەنتى ۆلاديمير زەلەنسكي Bloomberg اگەنتتىگىنە ۆاشينگتوننىڭ كەپىلدىكتەرى عانا ۋكراينانىڭ كرەملمەن كەلىسسوزدەر جۇرگىزەتىن سەنىمدى شارتى بولا الاتىنىن مالىمدەدى.
«جالعىز سۇراق: قاۋىپسىزدىككە قانداي كەپىلدىك بار؟ شىنىمدى ايتسام، كەلىسسوز الدىندا ءبارىن ءتۇسىنىپ العىم كەلەدى»، - دەدى ول.
زەلەنسكي «كەيبىر ەۋروپالىق دوستار» ولاي ويلاماسا دا، ا ق ش- تىڭ قاتىسۋىنسىز ەسەپ ايىرىسۋ مۇمكىن ەمەس دەپ سانايدى.
«جوق، بۇل مۇمكىن ەمەس. امەريكا قۇراما شتاتتارىنسىز ەشكىم تاۋەكەل ەتە المايدى»، - دەدى ول.
ۋكراينا پرەزيدەنتى زەلەنسكي ترامپتى قىتاي كوشباسشىسى شي جينپيڭمەن بىرگە بۇل ماسەلەدە ەڭ ىقپالدى پرەزيدەنت دەپ اتادى. زەلەنسكي: «مۇنى شىنىمەن جۇزەگە اسىرا الاتىن باسقا وداقتاس جوق. پۋتيننىڭ ەكونوميكاسى قىتايعا قاتتى تاۋەلدى».
زەلەنسكيدىڭ ايتۋىنشا، كيەۆ ۋكراينانىڭ تاعدىرى ونسىز شەشىلگەنىن قالامايدى. ول ا ق ش بۇعان جول بەرمەيتىنىنە سەنىم ءبىلدىردى.
زەلەنسكي الەۋمەتتىك جەلىلەردە رەسەيگە قىسىم كورسەتىپ، ونى كەلىسسوز ۇستەلىنە وتىرعىزۋ ءۇشىن ەنەرگەتيكالىق رەسۋرستارعا، اسىرەسە مۇنايعا قاتىستى شەكتەۋلەر قولدانۋ - بەيبىتشىلىك پەن قاۋىپسىزدىكتىڭ ەڭ ماڭىزدى كىلتتەرىنىڭ ءبىرى ەكەنىن مالىمدەدى.
«كۇش كورسەتۋ ارقىلى بەيبىتشىلىككە قول جەتكىزۋگە بولادى جانە ءبىز بۇعان سەنىمدىمىز. ەڭ باستىسى - قارقىنىن باسەڭدەتپەۋ جانە رەسەيگە قىسىم جاساۋ... ەۋروپا رەسەيمەن ەمەس، امەريكامەن جانە ەنەرگەتيكالىق رەسۋرستارداعى باسقا جاھاندىق سەرىكتەستەرمەن تىعىز جۇمىس ىستەۋى كەرەك»، - دەپ جازدى زەلەنسكي.
جۋىردا ترامپ ماسكەۋ ۋكراينا بويىنشا مامىلە جاساسۋدان باس تارتسا، رەسەي امەريكا قۇراما شتاتتارىنا جانە باسقا ەلدەرگە ساتاتىن بارلىق نارسەگە سانكسيالار سالاتىنىن ايتتى.
