زاڭ جوباسى: نەسيە تولەمىن كىمدەر كەيىنگە شەگەرە الادى

ماجىلىستە زاڭ جوباسىن تانىستىرعان قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆا مەرزىمى وتكەن كرەديتتەردىڭ ماسەلەسىن رەتتەۋ كەزىندە حالىقتىڭ الەۋمەتتىك وسال توپتارىنا جاتاتىن ادامدار مەن توتەنشە جاعداي سالدارىنان زارداپ شەككەندەردى قوسىمشا قورعاۋ ۇسىنىلىپ وتىرعانىن ايتتى.

«وسى ساناتقا جاتاتىن ازاماتتار ءۇشىن بەرەشەكتى رەتتەۋ كەزىندە قارىزدار مەن ميكروكرەديتتەر بويىنشا تولەم مەرزىمىن مىندەتتى تۇردە كەمىندە 3 اي مەرزىمگە كەيىنگە قالدىرۋ، سونداي-اق اي سايىنعى تولەمدى 50 جانە ودان دا كوپ پايىزعا ازايتۋ كوزدەلەدى. قارىز الۋشى- جەكە تۇلعالاردىڭ قۇقىقتارىن قورعاۋ ءۇشىن بانكتىك قارىزداردى مەرزىمىنەن بۇرىن وتەگەنى ءۇشىن ايىپاقى الۋعا تىيىم سالىنادى. ميكروكرەديتتى قايتارماعانى ءۇشىن ايىپاقىنى قوسپاعاندا، ازاماتتاردىڭ ميكروكرەديتتەرى بويىنشا كەز كەلگەن ايىپاقى ءوندىرىپ الۋعا تىيىم سالىنادى»، - دەدى ول.

ونىڭ ايتۋنىشا، اتالعان نورما بانكتەن قارىز نەمەسە ميكروكرەديت الۋ ءۇشىن جاسالاتىن ساقتاندىرۋ شارتتارىنىڭ ساقتاندىرۋ كوميسسياسى %10 شەگىندە بەلگىلەنەدى.

«تۇتىنۋشىلاردى ماجبۇرلەپ جۇكتەلگەن قارجى ونىمدەرىنەن قورعاۋ ماقساتىندا، قارجى ۇيىمدارىندا قارجى ونىمدەرىن ازىرلەۋ مەن ەنگىزۋدىڭ ىشكى راسىمدەرىنىڭ بولۋ تالابى ەنگىزىلەدى»، - دەدى اگەنتىك باسشىسى.

سونداي-اق، ول تۇتىنۋشىلاردىڭ ۋاقتىلى كەرى بايلانىس الۋى ءۇشىن قارجى ۇيىمدارىنىڭ كليەنتتەردىڭ وتىنىشتەرىن 15 جۇمىس كۇنى ىشىندە قاراۋى كەرەك بولاتىنىن ايتتى.

وسىعان دەيىن بىرىككەن اراب امىرلىكتەرى قازاقستاندا امبەباپ بانك اشقالى جاتقانى تۋرالى جازدىق.

اۆتور
ەسىمجان ناقتىباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى