يزرايلدىڭ گازا سەكتورىنا جاساعان سوققىسىنان ب ۇ ۇ- نىڭ ءبىر قىزمەتكەرى كوز جۇمدى
استانا. KAZINFORM - يزرايلدىڭ گازاعا جاساعان سوققىسىنان ب ۇ ۇ دەمەۋشىلىك ەتەتىن ۇيىمنىڭ ءبىر قىزمەتكەرى قازا تاۋىپ، بەسەۋى جارالاندى. بۇل تۋرالى پالەستينا انكلاۆىنىڭ دەنساۋلىق ساقتاۋ مينيسترلىگى حابارلادى، دەپ جازادى ت ا س س.
- ب ۇ ۇ-عا قاراستى ۇيىمداردا جۇمىس ىستەگەن 6 شەتەلدىك ازامات گازانىڭ ورتالىعىنداعى اۋە شابۋىلى كەزىندە جاراقات الدى. ولاردىڭ ءبىرى شۋھادا ءال-اقسا اۋرۋحاناسىنا جەتكەننەن كەيىن كوز جۇمدى، - دەپ جازادى گازا دەنساۋلىق ساقتاۋ مينيسترلىگى Telegram ارناسىندا.
دارىگەرلەر جاراقات العانداردىڭ جاعدايى اۋىر ەكەنىن ايتتى.
ءوز كەزەگىندە مىسىرلىق «ءال-كاحيرا ءال-يحباريا» تەلەارناسى دەرەككوزدەرگە سىلتەمە جاساپ، وق جاۋعان ب ۇ ۇ قىزمەتكەرلەرى گازا سەكتورىن مينالاردان تازارتۋمەن اينالىسقانىن مالىمدەگەن. وقيعا انكلاۆتىڭ ورتالىق بولىگىندەگى دەير-ەل-بالاح قالاسىنىڭ ايماعىندا بولدى.
18-ناۋرىزدا يزرايل قورعانىس كۇشتەرى گازا سەكتورىنداعى حاماس نىساندارىنا جاپپاي سوققى بەردى.
نەتانياحۋ بۇدان بىلاي حاماس-پەن كەلىسسوزدەر تەك وق استىندا جۇرگىزىلەتىنىن مالىمدەگەن.
ايتا كەتەيىك، يزرايلدىڭ گازاداعى شابۋىلدارىنان قازا تاپقاندار سانى 48543 كە جەتتى.
