يزرايلدە ازەربايجاننىڭ 7 ازاماتى تىڭشىلىق جاسادى دەپ قاماۋعا الىندى
استانا. KAZINFORM - ازەربايجاننان كەلگەن 7 يزرايل ازامات يراننىڭ پايداسىنا تىڭشىلىق جاسادى دەگەن كۇدىككە ءىلىندى. بۇل تۋرالى يزرايلدىڭ بارلاۋ قىزمەتىنە سىلتەمە جاساپ Kazinform-نىڭ مەنشىكتى ءتىلشىسى حابارلايدى.
ۆەدومستۆونىڭ مالىمەتىنشە، قىلمىستىق توپ ەكى جىلداي جۇمىس جاساعان. ولار وسى ۋاقىت ىشىندە قوماقتى سوماعا 600 تاپسىرما ورىندالعان. كۇدىكتىلەر اسكەري بازالاردى، سونىڭ ىشىندە 1-قازانداعى شابۋىلدا نىساناعا الىنعان ورىنداردى فوتوعا تۇسىرگەن.
كۇدىكتىلەردىڭ بارلىعى - حايفا مەن ەلدىڭ سولتۇستىك بولىگىنىڭ تۇرعىندارى، ولار يزرايل جانە ازەربايجاننىڭ قوس ازاماتتىعىنا يە. ولاردىڭ اراسىندا دەزەرتير مەن كامەلەتكە تولماعان ەكى جاس ءوسپىرىم بار. سوت كامەلەتكە تولعان بەس كۇدىكتىنىڭ ەسىمىن جاريالادى - ازيز نيسانوۆ، الەكساندر ساديكوۆ، يگال نيسان، ۆياچەسلاۆ گۋشين جانە ەۆگەني يوففە. كامەلەتتىك جاسقا تولماعان ەكى بالانىڭ اتى-ءجونى جاريالانعان جوق. كۇدىكتىلەردىڭ بارلىعى مەملەكەتتىك قاۋىپسىزدىككە قارسى قىلمىس جاسادى دەپ ايىپتالۋدا.
سونىمەن قاتار، ولار ارميا بازالارىن فوتوسۋرەتكە ءتۇسىرىپ، ولار تۋرالى اقپارات جينادى دەگەن كۇدىككە ءىلىندى. سونىڭ ىشىندە يزرايل اۋە كۇشتەرىنىڭ نيەۆاتيم جانە رامات-داۆيدەگى بازالارى جانە تەل-اۆيۆتەگى «كيريا» باس شتابىنىڭ كەشەنى بار. تەرگەۋ مالىمەتىنشە، ىسكە قاتىسى بار تۇلعالار جينالعان اقپاراتتى يرانعا وتكىزگەن.
ەگەر ايىپتالۋشىلاردىڭ كىناسى تولىق دالەلدەنسە، ولار ءومىر بويىنا سوتتالۋى مۇمكىن.
اۆتور
زارينا تۋعانبايەۆا
