يزرايل تۇرمەسىندە 45 جىل وتىرعان پالەستينالىق بوستاندىققا شىعۋى مۇمكىن
استانا. KAZINFORM - يزرايل تۇرمەسىندەگى «پالەستينالىق تۇتقىنداردىڭ كوسەمى» لاقاپ اتىمەن بەلگىلى نايل ءال-بەرگۋسي 45 جىلدىق قاماۋدان كەيىن بوساتىلادى، دەپ حابارلايدى TRT اقپاراتتىق اگەنتتىگى.
تۇركيا راديو تەلەۆيزيا پورتالىنىڭ جازۋىنشا، نايل ءال-بەرگۋسي يزرايل تۇرمەسىندە 45 جىلدان استام ۋاقىتىن وتكىزگەن الەمدەگى ەڭ ۇزاق مەرزىمدى ساياسي تۇتقىن رەتىندە گيننەستىڭ رەكوردتار كىتابىنا ەنگەن. ءال-بەرگۋسي ءومىرىنىڭ جارتىسىنان كوبىن يزرايل تۇرمەلەرىندە وتكىزگەندىكتەن «پالەستينالىق تۇتقىنداردىڭ كوسەمى» دەگەن لاقاپ اتقا يە بولدى.
- ول «پالەستينادان شىعىپ كەتۋ» شارتىمەن بوساتىلماق. بۇعان دەيىن نايل جەر اۋدارىلۋدان باس تارتقان بولاتىن، ءبىراق دۇيسەنبىدەن باستاپ بۇل شەشىمدى قابىلداۋعا ءماجبۇر بولدى. الايدا ونىڭ ناقتى قاي ەلگە جىبەرىلەتىنى ءالى بەلگىسىز، - دەپ مالىمدەدى نايل ءال-بەرگۋسيدىڭ ايەلى يمان نافي.
نايد ءال-بەرگۋسي العاش رەت 1978 -جىلى 19 جاسىندا تۇرمەگە توعىتىلعان جانە يزرايل مەن حاماس اراسىنداعى تۇتقىن الماسۋ كەلىسىمى بويىنشا 2011 -جىلى عانا بوساتىلعان. ارتىنشا ول بىرنەشە رەت ۇستالدى، ءبىراق ءبىراز ۋاقىتتان كەيىن قايتادان بوساتىلدى. ول سوڭعى رەت 2014 -جىلى 20 -ماۋسىمدا ءۇش ەۆرەي قونىستانۋشىنى ولتىرۋگە قاتىسى بار دەگەن ايىپپەن ۇستالدى. 2017 -جىلى 22 - اقپاندا يزرايل سوتى ونى 18 جىلعا باس بوستاندىعىنان ايىردى.
ايتا كەتەيىك، يزرايل پرەمەر-ءمينيسترى بەنيامين نەتانياحۋ قاڭتار ايىندا ءبىتىم مەن تۇتقىن الماسۋ جونىندەگى مالىمدەمەسىندە بوساتىلاتىن پالەستينالىقتاردىڭ ەلدەن شىعارىلاتىنىن ايتقان بولاتىن.
ەسكە سالساق، بۇعان دەيىن حاماس بەيسەنبى كۇنى تاراپتار اراسىنداعى كەلىسىم اياسىندا پالەستينالىق تۇتقىندارعا ايىرباس رەتىندە كەپىلگە الىنعان ءتورت ادامنىڭ ءمايىتىن يزرايلگە بەرەتىنىن جازعان ەدىك.
اۆتور
باقىتجول كاكەش
