يزرايل سوعىسقا «ءبىراز ءۇزىلىس» جاساۋعا دايىن - نەتانياحۋ
يزرايل پرەمەر-ءمينيسترىنىڭ ايتۋىنشا، گۋمانيتارلىق كومەك جەتكىزۋ جانە حاماس توبى كەپىلگە العانداردى بوساتۋ ءۇشىن ءۇزىلىس جاسالۋى مۇمكىن.
نەتانياحۋ يزرايل گازاداعى «جالپى قاۋىپسىزدىكتى» باقىلاۋعا الاتىنىن ايتتى، دەپ حابارلايدى Kazinform بۇل تۋرالى DW جاڭالىقتارىنا سىلتەمە جاساپ.
«يزرايل گازا سەكتورىنداعى اسكەري ارەكەتتەرگە «شاعىن تاكتيكالىق ءۇزىلىس» جاساۋ مۇمكىندىگىن قاراستىرۋعا دايىن»، - دەپ مالىمدەدى يزرايل پرەمەر-ءمينيسترى بينيامين نەتانياحۋ 7- قاراشاعا قاراعان ءتۇنى.
نەتانياحۋ گۋمانيتارلىق كومەكتىڭ جەتكىزىلۋىن جەڭىلدەتۋ نەمەسە حاماس سودىرلارى كەپىلگە الىنعانداردى بوساتۋ ءۇشىن ءۇزىلىس جاساۋعا بولاتىنىن ايتتى.
سونىمەن بىرگە، يزرايل اتىستى توقتاتۋدان باس تارتادى جانە يزرايلدە، ەۋرووداقتا، ا ق ش- تا جانە باسقا دا ءبىرقاتار ەلدەردە تەرروريستىك دەپ تانىلعان حاماس توبى باسقاراتىن گازا سەكتورىندا كەپىلگە الىنعان ادامدار بوساتىلمايىنشا، ەشقانداي جەڭىلدەتۋدى قابىلدامايتىنىن مالىمدەدى.
نەتانياحۋ بۇل مالىمدەمەنى امەريكالىق ABC News تەلەارناسىنىڭ سوعىس اياقتالعاننان كەيىن گازانى كىم باسقارادى دەگەن سۇراعىنا جاۋاپ بەرۋ كەزىندە جاسادى.
«مەنىڭ ويىمشا، يزرايل ءبىراز ۋاقىتقا دەيىن قاۋىپسىزدىك ءۇشىن جالپى جاۋاپكەرشىلىكتى ءوز موينىنا الۋى كەرەك، ويتكەنى ءبىز جاۋاپكەرشىلىك بولماعان جاعدايدا نە بولاتىنىنا كوزىمىز جەتتى»، - دەدى نەتانياحۋ.
