يزرايل: سوعىس قيمىلدارىندا ءۇزىلىس بولمايدى
ا ق ش- تىڭ سوعىس قيمىلدارىنا گۋمانيتارلىق ءۇزىلىس جاساۋعا شاقىرعان مالىمدەمەسىنەن كەيىن يزرايل ۇكىمەتى شابۋىلداردىڭ جالعاسا بەرەتىنىن، تەك گازا سەكتورىنىڭ سولتۇستىگىندەگى بەيبىت تۇرعىندارعا ارنالعان ءدالىزدىڭ جۇمىس ىستەيتىنىن مالىمدەدى. بۇل تۋرالى Kazinform اگەنتتىگى انادولىعا سىلتەمە جاساپ حابارلايدى.
يزرايل پرەمەر- ءمينيسترى باسپا ءسوز قىزمەتىنىڭ جازباشا مالىمدەمەسىندە «بارلىق كەپىلگە الىنعاندار بوساتىلمايىنشا، گازاداعى قاقتىعىستار جالعاسا بەرەتىنى» ايتىلعان.
يزرايل گازا سەكتورىنىڭ سولتۇستىگىنەن وڭتۇستىگىنە دەيىن سوزىلعان بەيبىت تۇرعىنداردىڭ وڭتۇستىككە وتۋىنە اشىق «قاۋىپسىز دالىزگە» رۇقسات بەردى
گازانىڭ 50 مىڭ تۇرعىنىنىڭ كەشە وسى ءدالىز ارقىلى وتكەنى ايتىلىپ، قالعان تۇرعىندار وڭتۇستىككە جىلجۋعا شاقىرىلعان.
يزرايل پرەمەر- ءمينيسترىنىڭ مالىمدەمەسى اقۇيدىڭ يزرايل گازا سەكتورىنىڭ سولتۇستىك بولىگىنىڭ بەيبىت تۇرعىندارىنا شىعۋعا مۇمكىندىك بەرۋ ءۇشىن «سوعىس قيمىلدارىن كۇنىنە 4 ساعاتقا توقتاتۋعا» كەلىسكەنى تۋرالى مالىمدەمەسىنەن كەيىن جاسالدى.
اقۇي ءوز مالىمدەمەسىندە «سوعىس قيمىلدارىنا گۋمانيتارلىق ءۇزىلىس جاريالاۋ» تۋرالى ايتسا، يزرايل پرەمەر- ءمينيسترىنىڭ مالىمدەمەسى سوعىس قيمىلدارىندا ءۇزىلىس بولمايتىنى جانە تەك «گۋمانيتارلىق ءدالىزدىڭ» اشىق بولاتىنى ايتىلعان.
اۆتور
ەركەجان سماعۇلوۆا
