يزرايل مەن حاماس قاقتىعىسى سوعىستان تەرروريزمگە اۋىستى - ريم پاپاسى فرانتسيسك
ريم پاپاسى سارسەنبى تاڭىندا حاماس تۇتقىنعا العان يزرايلدىكتەردىڭ تۋىستارىمەن، سونداي-اق گازا سەكتورىندا وتباسىلارى زارداپ شەگىپ وتىرعان پالەستينالىقتارمەن جەكە كەزدەسۋلەر وتكىزدى. كەزدەسۋلەردەن كەيىن ول قاقتىعىس سوعىس شەڭبەرىنەن شىعىپ، «تەرروريزمگە» اينالعانىن ايتتى. Kazinform اگەنتتىگىنىڭ ءتىلشىسى بۇل تۋرالى Vatican News-كە سىلتەمە جاساپ حابارلايدى.
ءوزىنىڭ رەزيدەنتسياسىنداعى كەزدەسۋلەردەن كەيىن كوپ ۇزاماي اۋليە پەتر الاڭىنداعى جالپى اۋديەنتسيادا جوسپاردان تىس ءسوز سويلەگەن فرانتسيسك قاقتىعىستا «ەكى تاراپتىڭ قالاي زارداپ شەگىپ جاتقانىن» ەستىگەنىن ايتتى. ريم پاپاسى فرانتسيسك ەكى كەزدەسۋدە دە ءوز قايعىسىن جانە ولاردىڭ قايعىسىنا جاقىندىعىن ءبىلدىردى.
«سوعىس نە ىستەمەيدى. ءبىراق وسى جەردە سوعىستان تىس شىقتىق. بۇل - سوعىس ەمەس. بۇل - لاڭكەستىك»، - دەدى پونتيفيك.
ول ءوز ۇندەۋىندە ءارتۇرلى سوعىستاردان، اسىرەسە ۋكراينا، يزرايل جانە پالەستينادا زارداپ شەككەندەردىڭ بارلىعى ءۇشىن دۇعا ەتتى.
پاپا تاڭعى ساعات 7:30 دا كاسا-سانتا-مارتاداعى رەزيدەنتسياسىندا يزرايل دەلەگاتسياسىنىڭ 12 مۇشەسىمەن كەزدەستى. سودان كەيىن تاڭعى ساعات 8:00 دە پاۆەل VI زالىندا پالەستينا دەلەگاتسياسىمەن كەزدەستى. پالەستينا دەلەگاتسياسىنىڭ قۇرامىندا 10 ادام بولدى.
«پالەستينا حالقى ءۇشىن دۇعا ەتەيىك، يزرايل حالقى ءۇشىن، بەيبىتشىلىك بولسىن دەپ دۇعا ەتەيىك»، - دەپ قورىتىندىلادى ريم پاپاسى.
كيەلى تاق باسپا ءسوز قىزمەتىنىڭ ديرەكتورى ماتتەو برۋنيدىڭ بىرنەشە كۇن بۇرىن ريم پاپاسى فرانتسيسك دەلەگاتسيالارمەن كەزدەسەتىنىن جاريالاپ، بۇل كەزدەسۋلەر ريم پاپاسىنىڭ «زارداپ شەككەن ءاربىر ادامعا رۋحاني جاقىندىعىن» كورسەتۋ ماقساتىندا «تەك گۋمانيتارلىق سيپاتتا» بولاتىنىن اتاپ ءوتتى.
