يزرايل كۇشتەرى گازانىڭ سولتۇستىگىنە قايتىپ ورالماق بولعان پالەستينالىقتارعا وق جاۋدىردى

وقيعا بۇعان دەيىن گازا سەكتورىنىڭ وڭتۇستىگىنە ەۆاكۋاتسيالانعان پالەستينالىقتار يزرايل اسكەرىنىڭ ولارعا ورنىندا قالىپ، گازا سەكتورىنداعى سوعىس قيمىلدارى ايماعىنا جاقىنداماۋى تۋرالى ەسكەرتۋىنە قاراماستان سەكتوردىڭ سولتۇستىگىندە ۇيلەرى مەن مەنشىگىن تەكسەرۋگە ارەكەت ەتكەندە بولعان. Kazinform بۇل تۋرالى Associated Press-كە سىلتەمە جاساپ حابارلايدى.

جۇما كۇنى تاڭەرتەڭ يزرايل قورعانىس اسكەرى (ساحال) گازا ۇستىنەن ۇندەۋ پاراقتارىن شاشىپ، وندا تۇرعىنداردى سەكتوردىڭ سولتۇستىگىندەگى ۇيلەرىنە قايتىپ ورالماۋىن، سەبەبى بۇل اۋدان ءالى دە سوعىس قيمىلدارىنىڭ ايماعى، قايتىپ كەلۋگە تىيىم سالىنعانىن جانە قاۋىپتى ەكەنىن ەسكەرتتى.

نەگىزىندە يزرايل اسكەريلەرى حاماس گازا تۇرعىندارىن انكلاۆتىڭ سولتۇستىك بولىگىنە ورالۋعا تالپىندىرۋعا نەمەسە يتەرمەلەۋگە تىرىسادى دەپ كۇتكەن. وسى سەبەپتى يزرايل ارمياسى جينالعانداردى تاراتۋ ادىستەرىن قولدانۋعا دايىن ەكەنىن ايتىپ، حالىقتى گازا سەكتورىنىڭ سولتۇستىگىنە قايتا ورالماۋىن ەسكەرتتى.

وسىعان قاراماستان، جۇما كۇنى تاڭەرتەڭ يزرايل مەن حاماس اراسىنداعى ءتورت كۇندىك ءبىتىم كۇشىنە ەنگەننەن كەيىن كۋاگەرلەر جۇزدەگەن پالەستينالىقتاردىڭ گازا سەكتورىنىڭ سولتۇستىگىنە بارماق بولعانىن بايقادى. ولاردىڭ حابارلاۋىنشا، يزرايل اسكەرلەرى سولتۇستىككە وتپەك بولعان ادامدارعا وق جاۋدىرعان.

باسىلىمنىڭ تاراتقان دەرەگىندە، جاراقات العاندار مەن قازا بولعانداردىڭ دەنەلەرى گازا سەكتورىنىڭ وڭتۇستىگىندەگى دەير- ءال- بالاح قالاسىنىڭ «ءال- اكسا ازاپتالۋشىلارى» اۋرۋحاناسىنا جەتكىزىلدى. جاراقات العانداردىڭ اياقتارىنا وق تيگەن.

انادولى اقپارات اگەنتتىگىنىڭ دەنساۋلىق ساقتاۋ كوزدەرىنە سىلتەمە جاساپ حابارلاعان مالىمەتتە، يزرايل اسكەريلەرىنىڭ وعىنان ءبىر ادام كوز جۇماعانى جازىلعان. جەتى اپتا بۇرىن پالەستينالىق توپتىڭ ءيزرايلدىڭ وڭتۇستىگىندەگى ەلدى مەكەندەرگە قاندى شابۋىل جاساۋىمەن باستالعان حاماس پەن يزرايل اراسىنداعى سوعىستىڭ العاشقى كۇندەرىنەن بەرى يزرايل ارمياسىنىڭ بۇيرىعىمەن جۇزدەگەن مىڭ ادام انكلاۆتىڭ سولتۇستىگىندەگى ۇيلەرىن تاستاپ كەتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى