يزرايل حاماسپەن ءۇزىلىس تۋرالى كەلىسىمدى ۇزارتۋى مۇمكىن: نەتانياحۋ ۆيدەوۇندەۋ جاسادى

بينيامين نەتانياحۋ ا ق ش پرەزيدەنتى دجو بايدەنمەن تەلەفون ارقىلى سويلەسكەننەن كەيىن ۆيدەوۇندەۋ جاساپ، وسىلاي دەپ ايتتى.

پرەمەر-ءمينيستردىڭ مالىمدەۋىنشە، ول ا ق ش پرەزيدەنتىنە گازاداعى اسكەري قيمىلدارعا «بار كۇشىمەن» قايتا ورالۋعا نيەتتى ەكەنىن حاباردار ەتكەن.

ونىڭ سوزىنشە، يزرايل «حاماستى جويۋدى»، تۇتقىنعا الىنعانداردىڭ ءبارىن قايتارۋدى جانە گازانىڭ «بۇرىنعى كۇيگە ورالماۋىن» قامتاماسىز ەتۋدى ماقسات ەتىپ وتىر.

بۇل رەتتە حاماس وكىلدەرى دە كوبىرەك تۇتقىندى بوساتۋ ءۇشىن يزرايلمەن گۋمانيتارلىق ءۇزىلىستى ۇزارتۋعا نيەتتى ەكەنىن مالىمدەدى.

يزرايل مەن حاماس اراسىنداعى قاقتىعىسقا تورتكۇندىك گۋمانيتارلىق ءۇزىلىس تۋرالى ءبىتىم جۇما، 24- قاراشا كۇنى جەرگىلىكتى ۋاقىت بويىنشا تاڭعى ساعات 07:00 دە كۇشىنە ەنگەن بولاتىن.

ءبىتىم يزرايل تۇرمەلەرىندەگى 150 پالەستينالىق تۇتقىندى حاماس ۇستاعان 50 يزرايلدىككە ايىرباستاۋدى قاراستىرادى.

بوستاندىققا شىعارىلاتىندار اراسىندا ەكى جاقتان دا ايەلدەر مەن بالالار بار. قازىرگى ۋاقىتتا كەلىسىم اياسىندا گازا سەكتورىندا ۇستالعان يزرايلدىك 39 ايەل مەن بالا، سونداي-اق يزرايل تۇرمەلەرىندەگى 117 پالەستينالىق ايەل مەن بالا بوساتىلدى.

ەسكە سالايىق، پالەستينالىق حاماس توبى 7- قازان كۇنى يزرايلگە شابۋىل جاساپ، مۋزىكالىق فەستيۆال ءوتىپ جاتقان جەردەن كوپتەگەن ادامدى كۇشتەپ اكەتكەن بولاتىن. تۇتقىنعا الىنعاندار اراسىندا قىتاي مەن تايلاند ازاماتتارى دا بار ەكەنى ايتىلدى.

22- قاراشادا يزرايل مەن حاماس تۇتقىنداردى بوساتۋعا، سوعىستى ۋاقىتشا توقتاتۋعا كەلىسكەنىن جازدىق.

تۇتقىنداردىڭ العاشقى لەگى 24- قاراشادا بوساتىلا باستادى. ولار تايلاندتىڭ 12 ازاماتى ەكەنى ايتىلدى.

كەيىننەن حاماس تاعى 13 يزرايلدىككە ەركىنە قويا بەردى. وعان جاۋاپ رەتىندە يزرايل 39 پالەستينالىق تۇتقىندى جىبەردى. سونىمەن قاتار تايلاندتىڭ تاعى ءتورت ازاماتى بوساتىلدى.

بۇگىن حاماس قىزىل كرەستكە يزرايلدىك تۇتقىنداردىڭ ءۇشىنشى توبىن تاپسىرعانى ءمالىم ەتىلدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى