يزرايل گازا سەكتورىنا قۇرلىقتان باسىپ كىرۋگە دايىندىق ۇستىندە
بەنيامين نەتانياۋددىڭ مالىمدەۋىنشە، يزرايل گازا سەكتورىنا قۇرلىقتان باسىپ كىرۋگە دايىندىق جۇرگىزۋدە. الايدا شابۋىل قاشان جاسالاتىنى بەلگىسىز. Kazinform اگەنتتىگى بۇل تۋرالى Financial Times-قا سىلتەمە جاساپ حابارلايدى.
يزرايل كوشباسشىسى سارسەنبىگە قاراعان ءتۇنى تەلەديدار ارقىلى حالىققا سويلەگەن سوزىندە حاماس سودىرلارىمەن «جەردە، جەر استىندا، گازادا جانە ودان تىس جەرلەردە» كۇرەسۋگە ۋادە بەردى، ءبىراق قۇرلىقتاعى وپەراتسيانىڭ قاشان بولاتىنىن ايتپادى.
«ءبىز - جارىقتىڭ، ال ولار قاراڭعىلىقتىڭ ۇلدارى»، - دەدى نەتانياحۋ.
ونىڭ بۇل سوزدەرى يزرايل اسكەرلەرىنىڭ گازا سەكتورىمەن شەكاراعا كەڭ كولەمدە ورنالاستىرىلۋى جانە ا ق ش-تىڭ ايماقتاعى اسكەري كۇشتەرىنىڭ ۇلعايۋى اياسىندا ايتىلدى.
«ءبىز قۇرلىقتاعى شابۋىلعا دايىندالىپ جاتىرمىز»، - دەدى تەك قارا كيىنگەن نەتانياحۋ يزرايلدىكتەرگە سويلەگەن سوزىندە.
«مەن قاشان، قالاي جانە قانشا (سارباز) بولاتىنىن ناقتىلامايمىن»، - دەدى ول.
نەتانياحۋ قۇرلىق شابۋىلىنىڭ ۋاقىتى اسكەري كابينەتتىڭ ءبىراۋىزدان قابىلدانعان شەشىمىمەن انىقتالاتىنىن ايتتى.
«حاماس-تىڭ بارلىق مۇشەلەرى ولەدى»، - دەدى ول.
سونداي-اق يزرايل كوشباسشىسى 7-قازاندا حاماس-تىڭ جويقىن شابۋىلدارىنا اكەلگەن قاۋىپسىزدىك ولقىلىقتارى مۇقيات تەكسەرىلەتىنىن ايتتى.
حاماس سودىرلارى يزرايلدىڭ وڭتۇستىك شەكاراسىنداعى ەلدى مەكەندەرگە باسىپ كىرىپ، 1400 يزرايلدىكتى ءولتىردى. ولاردىڭ كوبى بەيبىت تۇرعىندار. نەتانياحۋ بولعان وقيعاعا دا جاۋاپتى بولاتىنىن ايتتى.
ا ق ش پرەزيدەنتى دجو بايدەن ءوز كەزەگىندە يزرايلدىكتەر مەن پالەستينالىقتار اراسىنداعى «6 قازانداعىداي» ستاتۋس-كۆوعا قايتا ورالۋ بولمايتىنىن ايتتى، دەپ حابارلايدى BBC.
بايدەن بۇعان دەيىن وتكەن باسپا ءسوز ءماسليحاتىندا يزرايل «بەيبىت تۇرعىندار شىعىنىن ازايتۋ» ءۇشىن جەتكىلىكتى ارەكەت جاساپ جاتىر ما دەگەن سۇراققا «پالەستينالىقتار ايتىپ جاتقان ساندارعا سەنىمدى ەمەس ەكەنىن» اتاپ ءوتتى.
«مەن پالەستينالىقتاردىڭ قازا بولعان ادامدار تۋرالى مالىمەتتەرىنىڭ قانشالىقتى راس ەكەنىن بىلمەيمىن. مەن جازىقسىز ادامداردىڭ كوز جۇمعانىنا سەنىمدىمىن، سوعىستىڭ قۇنى وسى»، - دەدى بايدەن سارسەنبىدە تىلشىلەرگە.
وسى ارادا گازا سەكتورىندا وتىن تاۋسىلىپ، اۋرۋحانالار جەدەل جاردەم قىزمەتىنەن باسقاسىنىڭ بارلىعىنىڭ جۇمىسىن توقتاتتى. يزرايل گازا سەكتورىنا جانارماي جەتكىزۋگە توسقاۋىل قويدى.
