يزرايل اسكەريلەرى سيرياداعى الەپپو قالاسىنا شابۋىل جاسادى
كاير. قازاقپارات- يزرايل اسكەري جاساعىنىڭ سيريانىڭ سولتۇستىگىندەگى الەپپو قالاسىنا جۇما كۇنى تاڭەرتەڭ جاساعان شابۋىلىنان 38 ادام قازا تاپتى. ونىڭ ىشىندە ليۆاندىق «حەزبوللا» قارۋلى توبىنىڭ 5 مۇشەسى بار. بۇل تۋرالى Reuters جازدى.
جۇما كۇنى تاڭەرتەڭ سيريانىڭ قورعانىس مينيسترلىگى يزرايل مەن سودىر توپتار الەپپوعا شابۋىل جاساعاننان كەيىن بىرنەشە بەيبىت تۇرعىن مەن ساربازدىڭ قازا تاپقانىن حابارلادى. مينيسترلىكتىڭ مالىمدەمەسىندە يزرايل اۋە كۇشتەرى جەرگىلىكتى ۋاقىت بويىنشا تاڭعى 1:45-تە (GMT 22:45) الەپپوداعى بىرنەشە اۋدانعا سوققى بەرگەن.
اۋە شابۋىلدارى يدليب پەن الەپپونىڭ باتىس ايماقتارىنا جاسالعان شابۋىلدارىمەن تۇسپا- تۇس كەلگەن، مينيسترلىك «تەررور ۇيىمدارى» الەپپو جانە ونىڭ اينالاسىنداعى بەيبىت تۇرعىنداردى نىساناعا العانىن ايتتى.
الايدا مينيسترلىك قازا تاپقانداردىڭ ناقتى سانىن جاريالامادى. زارداپ شەككەندەردىڭ يزرايل اۋە سوققىسى نەمەسە سودىر توپتاردىڭ شابۋىلدارى سالدارىنان بولعانىن دا ايتپادى.
- اگرەسسيا ءبىرقاتار بەيبىت تۇرعىن مەن اسكەري قىزمەتكەردىڭ قازا بولۋى مەن جاراقات الۋىنا اكەپ سوقتى، - دەلىنگەن حابارلامادا.
بۇل وقيعاعا قاتىستى يزرايل اسكەريلەرى تۇسىنىكتەمە بەرۋدەن باس تارتتى.
يرانمەن بايلانىسى بار سودىرلار، سونىڭ ىشىندە «حەزبوللا» قازىر سيريانىڭ شىعىس، وڭتۇستىك جانە سولتۇستىك- باتىسىنداعى ۇلكەن اۋماقتاردى، سونداي- اق ەل استاناسىنىڭ اينالاسىنداعى بىرنەشە ەلدى مەكەندى باقىلايدى.
اۆتور
جاراسقان نۇرىبايەۆ
