ۆيزاسىز رەجيم: شەكارانىڭ ەكى جاعىندا قالعان قانداستار قۋانىپ ءجۇر

ۆيزالىق شەكتەۋدەن جىلدار بويى تۋعان- تۋىسىن كورمەگەن ولار، جاڭا كەلىسىمنىڭ ارقاسىندا ءبىر- بىرىمەن قاۋىشۋعا مۇمكىندىك الدى.

ۆيزاسىز رەجيم تۋرالى كەلىسىمنىڭ كۇشىنە ەنگەنىنە ون شاقتى كۇن بولدى. كورشىلەس ەلمەن شەكاراداعى وتكىزۋ پۋنكتتەردەن جەرگىلىكتى تۇرعىندار دا، كاسىپكەرلەر دە، تۋريستەر دە وتە باستادى. كولىك قاتىناسى دا ەداۋىر جاقسارىپ كەلەدى. شەكارادان ۆيزاسىز وتكەندەردىڭ ءبىرى جەرگىلىكتى شوپان شاتىقانباي. ول جۇبايى ۇلىدايمەن بىرگە 6 جىل كورمەگەن تۋعان- تۋىستارىنا اسىعىپ بارادى. ولار حالىقارالىق اۆتوۆوكزالدان اۆتوبۋسقا ءمىنىپ، العاش رەت الماتىعا قاراي العان بەتى وسى. قانداستاردىڭ قۋانىشىندا شەك جوق.

جالپى قىتايدىڭ شىڭجاڭ ولكەسىندەگى «قالجات-دۋلاتى» قۇرلىق پورتى قورعاسقا قاراعاندا اسا تانىمال ەمەس. الايدا جەرگىلىكتى تۇرعىندار ونىڭ بولاشاعىنا زور ءۇمىت ارتادى. بارىس- كەلىس ارتىپ تۇراقتى جۇمىس ورىندارى اشىلسا دەگەن نيەتتە. يمپورت پەن ەكسپورت ارتىپ كاسىپكەرلىكتى دامىتۋ جوسپاردا.

شاحرات نۇرىشيەۆ، ق ر قىتايداعى توتەنشە جانە وكىلەتتى ەلشىسى:

- قازاقستاندا تۇراتىن قانداستار كەزىندە زاڭدى تۇردە قىتايدىڭ ازاماتتىعىنان شىعىپ قازاقستان ازاماتتىعىن العان كىسىلەر دە قىتايعا كەز كەلگەن ۋاقىتتا كەلە الاتىن مۇمكىنشىلىككە يە بولىپ وتىر. ءبىز بىلەمىز كەيبىر ازاماتتار شەكارانىڭ ەكى جاعىندا قالىپ قويعان. قازىر وسى ۆيزاسىز رەجيمنىڭ ارقاسىندا تۋعان-تۋىستار ءوزارا قاۋىشاتىنداي مۇمكىنشىلىك الىپ وتىر.

بۇعان تەك قازاقستاندىقتار عانا ەمەس، قىتايلىق كاسىپكەرلەر دە ءماز. بۇرىن ايىنا ءبىر رەت وتەتىن ساۋداگەرلەر ەندى كۇندەلىكتى ەركىن ءوتىپ ءجۇر.

ۆەنگ يۋلين، كاسىپكەر:

- مەن 20 جىلدان بەرى كاسىپكەرلىك سالاسىندا جۇمىس ىستەيمىن. قازاقستانعا قاتىناۋ ايتارلىقتاي جەڭىلدەدى. ماسەلەن بيىل مەن كورشى ەلدە 5 رەت بولدىم. بۇرىن بۇل مۇمكىن ەمەس ەدى. ءبىز ول جاققا بارۋ ءۇشىن كوپ كۇش سالاتىنبىز. قازىر ءبىر كۇندە بارىپ ساۋدامىزدى جاساپ كەلەسى كۇنى قايتىپ كەلىپ ءجۇرمىز.

قازىرگى ۋاقىتتا بۇل پورت ارقىلى كوبىنەسە قىتاي جاقتان تاۋار كوپ وتەدى. جەرگىلىكتى كاسىپكەرلەر كەلەشەكتە قازاقستاننان سيىر ەتىن كوپتەپ الۋدى كوزدەپ وتىر. نارىقتا سۇرانىس بار. جالپى بۇل قۇرلىق پورتى جىلىنا 2 ميلليون تونناعا دەيىن جۇك وتكىزۋگە قاۋقارلى. الايدا بۇگىندە 20 پايىزدىق قۋاتتىلىقپەن جۇمىس ىستەپ تۇر. ەندى ۆيزاسىز رەجيمنەن كەيىن بۇل كورسەتكىش ارتا تۇسەرى انىق.

اۆتورى: رۋسلان باقىتبەك ۇلى

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى