يپوتەكالىق باعدارلاما كوپ، ءتيىمدىسى قايسى
استانا. KAZINFORM - پاتەردىڭ تولىق قۇنىن قالتا كوتەرمەگەن جاعدايدا كوپشىلىك ءتۇرلى يپوتەكالىق باعدارلامانى پايدالانادى. وسى ورايدا، تۇرعىن ءۇي نارىعى بويىنشا ساراپشى مامان اقەركە بوداۋبەك قىزى باعدارلامانىڭ بارىمەن تولىق تانىسپاي، شەشىم قابىلداماۋ كەرەكتىگىن ايتادى.
- بارلىق يپوتەكالىق باعدارلاما تۋرالى ءبىلىپ ءجۇرۋ كەرەك. سەبەبى كوپتەگەن ادام قاندايدا ءبىر باعدارلاما باستالعاندا ەموتسياعا بەرىلىپ جاتادى. ەگەر تىم اتىشۋلى، تانىمال باعدارلاما بويىنشا كوپشىلىكپەن بىرگە ءۇي الار بولساڭىزدار، قىمباتشىلىققا ۇرىنىپ قالۋلارىڭىز مۇمكىن. ءاربىر ازامات الدىن الا بارلىق يپوتەكالىق باعدارلامانى قاراپ، سالىستىرىپ، ساراپتاپ، سودان كەيىن بارىپ تاڭداسا، اناعۇرلىم جەڭىل بولارى انىق، - دەدى ول Jibek Joly ارناسىنىڭ «بۇگىن LIVE» باعدارلاماسىندا.
ساراپشى نارىقتاعى ءتيىمدى يپوتەكالىق باعدارلامالاردى دا اتاپ ءوتتى.
- بۇگىنگى تاڭدا 7-20-25-تىڭ اي سايىنعى تولەمدەرى عانا قولجەتىمدى بولىپ تۇر. ءبىراق مەرزىمى ۇزاقتاۋ. 25 جىلعا الاسىز. دەسە دە، قازىر جالدامالى پاتەردە تۇرىپ جاتقان قانشاما وتباسى بار. ارينە، ول كىسىلەرگە بىرەۋدىڭ پاتەرىنە 140-150 مىڭ تولەگەنشە، وسى اقشانى ءوز پاتەرىنە قۇيعانى ارتىق. بۇل مەن ايتقانداي وڭاي بولمايدى. ويتكەنى ول جەردە العاشقى جارنا بار. ودان بولەك قۇرىلىس ماسەلەسى تاعى بار. قۇرىلىس جۇمىستارىنا كوپ ازامات 3-4 ميلليون تەڭگە كەتەتىنىن ايتادى. بۇل اقشاعا جاسالعان قۇرىلىس جۇمىستارى ءسىزدىڭ كوڭىلىڭىزدەن شىعا ما دەگەن ماسەلە بار. بۇل - ەشقانداي تەحنيكانى قوسپاعانداعى سوما. بۇدان باسقا، ءۇي كەزەگىندە تۇراتىن ازاماتتارعا ارنالعان 2-10-20، 5-10-20 باعدارلامالارىنىڭ اي سايىنعى تولەمى از شىعادى، - دەيدى اقەركە بوداۋبەك قىزى.
يپوتەكالىق باعدارلامالاردى زەرتتەپ جۇرگەن مامان كەيىنگى جىلدارى پاتەر باعاسىنىڭ ەداۋىر كوتەرىلگەنىن ايتادى.
- ءبىر جىل بۇرىن قۇرىلىسى تولىق اياقتالعان ۇيلەردى 30-33 ميلليون تەڭگەگە تابۋعا بولاتىن ەدى. ءتىپتى بۇل اقشاعا ديزاينەرلىك جوندەۋ جاسالعان 2 بولمەلى پاتەر الۋعا بولاتىن. ال قازىر مۇنداي جاڭا ۇيلەر 40-45 ميلليون تەڭگەگە دەيىن بارادى. پاتەرلەرگە سۇرانىس بار بولسا، باعا دا وسە بەرەدى. ال سۇرانىستىڭ ارتۋىنا ءناپاقا تابۋ ماقساتىندا سىرت جاقتان كەلىپ جاتقان ازاماتتاردىڭ كوپ بولۋى سەبەپ. مۇنداي قارقىنمەن پاتەر باعاسىنىڭ تومەندەۋى ەكىتالاي. باعا تەك اپاتتى، توتەنشە جاعدايلاردا عانا تومەندەيدى، - دەيدى ساراپشى.
ساراپشى ءوزىنىڭ پاتەر الۋداعى لايفحاكتارىمەن دە ءبولىستى.
- مەن ءوزىم «وتباسى بانكتىڭ» 50/50 باعدارلاماسىمەن پاتەر الدىم. سەبەبى مەندە 50 پايىز جارنا قۇياتىن جينالعان اقشام بولدى. اقشانى جيناۋ ءۇشىن ارتىق شىعىندى تىيۋ كەرەك. قوناقتى كوپ كۇتۋدەن باس تارتقان ءجون. اقشانى كەرەك ەمەس زاتتار مەن ازىق- تۇلىككە جۇمساماي قويا تۇرۋ قاجەت. ايىنا 1000 تەڭگە بولسا دا، 10000 تەڭگە بولسا دا جيناپ وتىرۋ كەرەك. تيىن تەڭگەدەن قۇرالادى. وسىنى جاقسى تۇسىنسە، ادامدار ول اقشانى كەرەك ەمەس زاتقا جۇمساعانشا، جيناۋعا كىرىسەدى، - دەيدى ول.
ايتا كەتەيىك، ەلىمىزدە تاعى ءبىر يپوتەكالىق باعدارلاما ىسكە قوسىلدى. باعدارلاما تۋرالى تولىعىراق مىنا جەردەن بىلە الاسىز.
