يوردانيا، پالەستينا جانە مىسىر گازا سەكتورىنداعى گۋمانيتارلىق ءبىتىمدى قولدادى
يوردانيا، پالەستينا جانە مىسىر بيلىگى سارسەنبى كۇنى مالىمدەمە جاساپ، گازا سەكتورىندا پالەستينانىڭ حاماس قوزعالىسى مەن يزرايل اراسىندا شەتەلدىك دەلدالدىقپەن جاسالعان گۋمانيتارلىق كەلىسىمدى قۇپتايتىنىن ايتتى، دەپ حابارلايدى Kazinform اگەنتتىگىنىڭ ءتىلشىسى.
سارسەنبى كۇنى يزرايل مەن حاماس كەپىلگە الىنعان 50 ادامدى جانە كوپتەگەن پالەستينالىق تۇتقىندى بوساتۋعا مۇمكىندىك بەرەتىن كەلىسىمگە قول جەتكىزىپ، قورشاۋداعى گازا تۇرعىندارىنا اپتالاپ جالعاسقان سوعىستان كەيىن ءتورت كۇندىك ءبىتىم جاريالادى.
يوردانيا مالىمدەمەسىندە ءبىتىم گازا سەكتورىنداعى سوعىستى توقتاتاتىن جانە پالەستينالىقتاردىڭ شابۋىلعا ۇشىراپ، ءوز جەرىنەن كوشىپ كەتۋىنە جول بەرمەيتىن قادام بولادى دەپ ۇمىتتەنەتىنى ايتىلعان.
«سىرتقى ىستەر جانە ەكسپاتريانتتار ىستەرى مينيسترلىگى باۋىرلاس كاتار مەملەكەتىنىڭ مىسىر اراب رەسپۋبليكاسىمەن جانە امەريكا قۇراما شتاتتارىمەن سەرىكتەستىكتە جاساعان كۇش- جىگەرىن جوعارى باعالاي وتىرىپ، گازا سەكتورىنداعى گۋمانيتارلىق اتىستى توقتاتۋ تۋرالى كەلىسىمگە اكەلگەن كۇش- جىگەردى قۇپتايدى»، - دەلىنگەن يوردانيا س ءى م مالىمدەمەسىندە.
يوردانيا س ءى م رەسمي وكىلى، ەلشى سۋفيان ءال-كۋدا گازا سەكتورىندا اتىستى توقتاتۋدىڭ جالعاسىپ جاتقان سوعىستى تولىعىمەن توقتاتۋعا باعىتتالعان قادام رەتىندە ماڭىزىن اتاپ ءوتتى.
پالەستينا پرەزيدەنتى ماحمۋد ابباس ۋاقىتشا بىتىمگە كەلۋ كەلىسىمىن قۇپتاپ، يزرايل-پالەستينا اراسىنداعى ۇزاققا سوزىلعان قاقتىعىستى كەڭىرەك شەشۋگە شاقىردى.
يوردان وزەنىنىڭ باتىس جاعالاۋىندا ورنالاسقان ابباس اكىمشىلىگى «كاتار-مىسىر دەلدالدىق تالپىنىسىن باعالايتىنىن» جانە يزرايلمەن بىتىمگە كەلۋدىڭ ۇزارتىلۋىن جانە «حالىقارالىق زاڭدىلىققا نەگىزدەلگەن ساياسي شەشىمنىڭ جۇزەگە اسىرىلۋىن» قالايتىنىن ءمالىم ەتتى. بۇل تۋرالى پالەستينانى ازات ەتۋ ۇيىمى اتقارۋشى كوميتەتىنىڭ باس حاتشىسى حۋسەين اش-شەيح حابارلادى.
مىسىر پرەزيدەنتى ابدەل فاتتاح ءال-سيسي كەلىسىمدى قۇپتاپ، ونى مىسىر، كاتار جانە امەريكا اراسىنداعى ءساتتى دەلدالدىق دەپ اتادى.
Facebook الەۋمەتتىك جەلىسىندەگى رەسمي پاراقشاسىندا جاريالانعان مالىمدەمەدە ول مىسىردىڭ «ادىلدىك، بەيبىتشىلىك پەن پالەستينا حالقىنىڭ زاڭدى قۇقىقتارىن قامتاماسىز ەتۋ ءۇشىن ۇزاق مەرزىمدى جانە تۇراقتى شەشىمدەرگە قول جەتكىزۋدەگى ۇزدىكسىز كۇش-جىگەرى» دەپ اتاپ ءوتتى.
سونداي-اق ساۋد ارابياسى، مىسىر جانە يوردانيا سىرتقى ىستەر مينيسترلەرى لوندوندا ب ا ق بريفينگىندە يزرايل مەن حاماس توبى اراسىنداعى ۋاقىتشا بىتىمگە قول جەتكىزۋ تۋرالى كەلىسىمدى قۇپتاپ، ونى ۇزارتۋ كەرەك ەكەنىن جانە بۇل سوعىس قيمىلدارىن تولىق توقتاۋ جولىنداعى العاشقى قادام بولۋى ءتيىس ەكەنىن مالىمدەدى.
قازىرگى ۋاقىتتا اراب ەلدەرىنىڭ سىرتقى ىستەر مينيسترلەرى گازا سەكتورىنداعى سوعىستى توقتاتۋ جانە يزرايل- پالەستينا قاقتىعىسىن تۇپكىلىكتى شەشۋ ماقساتىندا ءيزرايلدىڭ نەگىزگى وداقتاستارىمەن جانە بۇۇ قاۋىپسىزدىك كەڭەسىنە مۇشە ەلدەرمەن لوببي جاساپ، كەزدەسۋلەر جۇرگىزىپ جاتقان نەگىزىنەن مۇسىلمان ەلدەرىنىڭ بايلانىس توبىن باسقارادى، دەپ جازادى Asharq Al-Awsat.
وسىلايشا، رەسمي دەڭگەيدە «گازاداعى سوعىستى توقتاتۋ ءۇشىن حالىقارالىق ارەكەتتەرگە جاۋاپتى اراب-يسلام مينيسترلەر كوميتەتى» دەپ اتالاتىن اتالعان بايلانىس توبى قىتاي جانە رەسەيدە بولدى. كوميتەت مۇشەلەرى لوندونعا باردى. بۇگىن ولار ۇلى بريتانيا سىرتقى ىستەر ءمينيسترى دەۆيد كەمەرونمەن كەزدەسىپ جاتىر.
