ۆيتسە-مينيستر: ب ا ق ءسوزىن «ماسس-مەديا» ۇعىمىنا وزگەرتۋىمىز قاجەت
مادەنيەت جانە اقپارات ۆيتسە-ءمينيسترى قانات ىسقاقوۆ اكىمشىلىك قۇقىق بۇزۋشىلىق تۋرالى كودەكسكە ب ا ق- قا قاتىستى قانداي وزگەرىس ەنگىزىلەتىنىن ايتتى، دەپ حابارلايدى قازاقپارات ءتىلشىسى.
بۇگىن ادىلەت مينيسترلىگىندە وتكەن زاڭ جوبالاۋ قىزمەتى ماسەلەلەرى جونىندەگى كەڭەستە «ق ر اكىمشىلىك قۇقىق بۇزۋشىلىق تۋرالى كودەكسىنە ب ا ق ماسەلەلەرى بويىنشا وزگەرىستەر ەنگىزۋ تۋرالى» كونسۋلتاتيۆتى قۇجات تالقىلاندى.
تالقىلاۋدان كەيىن ب ا ق وكىلدەرىنە سۇحبات بەرگەن قانات ىسقاقوۆ اتالعان وزگەرتۋلەر جۋرناليستەرگە ەشبىر شەكتەۋ قويمايتىندىعىن ايتادى.
«قولدانىستاعى اكىمشىلىك قۇقىق بۇزۋشىلىق تۋرالى كودەكستە «ب ا ق» ءسوزى كورسەتىلگەن. ءبىراق، ءبىز «ماسس-مەديا تۋرالى» زاڭ قابىلدايتىن بولعاندىقتان ب ا ق ۇعىمىن بارىنشا جان-جاقتى ءارى تۇسىنىكتى «ماسس-مەديا» ۇعىمىنا وزگەرتۋىمىز قاجەت. سوعان وراي بارلىق زاڭنامالىق اكتىلەردەگى اتالعان ءسوز وزگەرەتىن بولادى»، - دەدى ۆيتسە-مينيستر.
