ۆيتسە-مينيستر اياگوز اۋدانىندا تراكتورمەن سۋعا باتقاندار تۋرالى: وزدەرىنىڭ سانالى ارەكەتى
استانا. KAZINFORM - توتەنشە جاعدايلار ۆيتسە-ءمينيسترى باۋىرجان سىزدىقوۆ ۇكىمەت وتىرىسىنان كەيىن ب ا ق وكىلدەرىنىڭ ساۋالىنا بەرگەن جاۋابىندا اياگوز اۋدانىنداعى قايعىلى جاعدايدا جوعالىپ كەتكەن تۇرعىنداردى تاسقىننىڭ قۇرباندارى دەپ اتاۋدان باس تارتتى.
«ادام شىعىنى جوق» دەپ ايتقان كەزدە «بىزگە راحمەت ايتىڭىز نەمەسە ءبىزدى ماقتاڭىز» دەپ تۇرعان جوقپىن. قۋانىپ ايتىپ وتىرمىن. «شۇكىر» دەۋ كەرەك. ال تراكتورداعى ەكى ادامنىڭ جوعالۋى سۋ تاسقىنىنا قاتىسى جوق. ونى ءبىز دۇرىس ءتۇسىنۋىمىز كەرەك. ولار جول قىسقارتۋ ءۇشىن تاسىپ جاتقان وزەنگە وزدەرى كىرىپ وتىر. دەمەك، سۋدىڭ ورتاسىندا قالىپ كەتكەن جوق. تراكتورمەن جولدى قىسقارتام دەپ سۋعا كىرگەن. ون ساعات دەپ كوپ ايتىلعان شىعار. ونى ءبىز قارايىق. ورىسشا ايتقاندا «ۋ ستراحا گلازا ۆەليكيە» دەيدى عوي. ءورت بولىپ جاتقان كەزدە ءبىزدىڭ ازاماتتار «ءورت ءسوندىرۋ كولىگى جەتىپ بولمايدى» دەيدى. ءبىراق ءدال سول كەزدە شىن مانىندە ساناۋلى سەكۋندتار مەن مينۋتتار ءوتىپ جاتادى. بۇل جەردە دە تۋرا سونداي»، - دەدى ۆيتسە-مينيستر.
جۋرناليست اياگوزدەگى قايعىلى جاعدايعا جەرگىلىكتى توتەنشە جاعدايلار قىزمەتى نەگە دەن قويماعانىن سۇرادى.
«جەرگىلىكتى قۇتقارۋ قىزمەتىنىڭ جۇمىسىنان كەمشىلىك كورىپ تۇرعان جوقسىز با؟ ءبىر ۇلكەن اياگوزدە قالايشا ءبىر قايىق تابىلماي قالدى؟» - دەپ سۇرادى ب ا ق وكىلى.
«ءومىر بولعاننان كەيىن قاتەلىكتەر دە، كەمشىلىكتەر دە بولادى. مۇمكىن ونداي قاتەلىكتەر، كەمشىلىكتەر بولعان شىعار. ءبىراق ءبىز ءاربىر جاعدايدى زەرتتەپ، زەردەلەپ، تالداۋ جاسايمىز. وكىنىشكە قاراي، ءار وزەننىڭ باسىنا اپارىپ قوياتىن قۇتقارۋشىلارىمىز جوق. اياگوزدىڭ وزىنەن ول جەردە جەتۋگە ۋاقىت كەرەك. ال مەن نەگە ەكى تراكتورشىنىڭ سۋعا كەتكەنىن سۋ تاسۋمەن بايلانىستىرىپ وتىرعان جوقپىن؟ سەبەبى ولار سۋعا بارىپ تراكتورمەن تۇسپەسە، ەشتەڭە بولمايتىن ەدى. ماسەلە سوندا. ورىسشا ايتقاندا، ادامنىڭ ءوزىنىڭ «سوزناتەلنىي ارەكەتى». سونى ءبىز ءتۇسىنۋىمىز كەرەك، - دەيدى ول.
ايتا كەتەيىك، اباي وبلىسى اياگوز اۋدانىنىڭ قاراعاش اۋىلىندا 26-ناۋرىز كۇنى تراكتورمەن سۋعا كەتكەن ەكى ادام ءالى تابىلماي جاتىر. شالقار قاجىگەرەيەۆ پەن قۋانىشبەك مىرزاعازيندى قاراعاش اۋىلى ىرگەسىندەگى بورلى وزەنى اعىزىپ اكەتكەن.
