يتاليادا ەكى قىتاي ازاماتى وققا ۇشتى
استانا. KAZINFORM - يتاليا استاناسى ريمدە بەلگىسىز بىرەۋلەر ەكى قىتاي ازاماتىن اتىپ كەتتى. بۇل تۋرالى Lianhe Zaobao باسىلىمى حابارلادى.
قايعىلى وقيعا ءساۋىردىڭ 14 ءى كۇنى كەشكىسىن ريمنىڭ پينەتو اۋدانىندا بولعان. ەرلى-زايىپتى قىتاي ازاماتتارى ەلەكتروۆەلوسيپەدپەن ۇيلەرىنە قايتىپ كەلە جاتقاندا، موتوتسيكلمەن كەلگەن بەلگىسىز قارۋلى قاسكۇنەمدەر شابۋىل جاساعان.
كۋاگەرلەردىڭ ايتۋىنشا، وقيعا ورنىندا كەمىندە ون رەت وق اتىلعان، ونىڭ بىرنەشەۋى ەر ادامنىڭ باسىنا تيگەن. جەدەل جاردەم قىزمەتى كەلگەن ۋاقىتتا ەكەۋى دە قازا تاپقان بولاتىن. ولاردىڭ دەنەسى ءوز ۇيلەرىنىڭ كىرەبەرىسىندە تابىلىپ، ماڭايدا كوپتەگەن وق- ءدارى گيلزالارى شاشىلىپ جاتقان.
پوليتسيا قىلمىس ورنىن قورشاپ، بەينەباقىلاۋ كامەرالارى ارقىلى كۇدىكتىلەردى انىقتاۋعا كىرىستى. العاشقى مالىمەتتەرگە سايكەس، بۇل الدىن الا جوسپارلانعان جانە ۇيىمداسقان قاساقانا جاسالعان قىلمىس بولۋى مۇمكىن.
وقيعاعا بايلانىستى قىتايدىڭ يتالياداعى ەلشىلىگى 15-ءساۋىر كۇنى رەسمي مالىمدەمە جاساپ، قازا بولعان ازاماتتاردىڭ تۋىستارىنا كوڭىل ايتتى جانە قاجەتتى كونسۋلدىق كومەك كورسەتىپ جاتقانىن حابارلادى. سونىمەن قاتار، ەلشىلىك يتالياندىق پوليتسيامەن دەرەۋ بايلانىسىپ، جاعدايعا الاڭداۋشىلىق ءبىلدىرىپ، قىلمىستى شۇعىل تەرگەپ، كىنالىلەردى جازالاۋدى تالاپ ەتتى.
