يتاليادا «كوزا نوسترا» مافياسىنىڭ ۇلكەن باسشىسى قايتىس بولدى
يتاليادا ۇزاق جىلدار بويى ىزدەۋدە بولىپ، اقىرى قاڭتار ايىندا ۇستالعان ۇيىمداسقان قىلمىستىق توپتىڭ جەتەكشىسى ماتتەو مەسسينا دەنارو قايتىس بولدى، دەپ حابارلايدى قازاقپارات انادولى اگەنتتىگىنە سىلتەمە جاساپ.
يتاليانىڭ ANSA اقپارات اگەنتتىگىنىڭ حابارلاۋىنشا، ەلدىڭ وڭتۇستىگىندەگى سيتسيليا ارالىندا جۇمىس ىستەيتىن «كوسا نوسترا» مافيا توبىنىڭ «ۇلكەن باسشىسى»، ءبىرقاتار قىرعىندى ۇيىمداستىرۋشى رەتىندە تانىمال دەنارو اكۆيلا قالاسىنداعى تۇرمە اۋرۋحاناسىندا كوز جۇمعان.
ول مۇندا توق ىشەك قاتەرلى ىسىگى دياگنوزىمەن جاتىپ، ەم العان ەدى.
ۇزاق جىلدار بويى پوليتسيادان قاشىپ جۇرگەن دەنارو 16- قاڭتاردا ەلدىڭ وڭتۇستىگىندەگى پالەرمو قالاسىندا مەديتسينالىق كومەككە جۇگىنگەن كەزدە ۇستالدى.
ماتتەو مەسسينا دەنارونىڭ قاماۋعا الىنۋى ەلدە ۇلكەن رەزونانس تۋدىردى.
ول ۇستالعاننان كەيىن اكۆيلاداعى قاتاڭ رەجيمدەگى تۇرمەگە قامالىپ، جابىق مەكەمەنىڭ ىشىندەگى اۋرۋحانادا ەم العان. وتكەن دەمالىس كۇندەرى باسپا سوزدە ونىڭ «كوماعا قايتا تۇسكەنى» تۋرالى اقپارات شىقتى.
دەنارو سوڭعى 30 جىلداعى اۋقىمدى قىلمىستىق وقيعالارعا، سونىڭ ىشىندە مافياعا قارسى كۇرەسىنىڭ ارقاسىندا ەلدىڭ سيمۆولىنا اينالعان اتاقتى سۋديالار دجوۆانني فالكونە مەن پاولو بورسەللينونى ءولتىردى دەپ ايىپتالعان.
تەرگەۋشىلەردىڭ ايتۋىنشا، دەنارونىڭ 1993 -جىلى ميلان، فلورەنسيا جانە ريمدە بولعان لاڭكەستىك ارەكەتتەرگە دە قاتىسى بار.
