ىستامبۇل مەرى تۇرمەگە جەتكىزىلدى
انكارا. KAZINFORM - سىبايلاس جەمقورلىق ءىسى بويىنشا تۇتقىندالعان ىستامبۇل مەرى ەكرەم يماموگلۋ كەشە ىستامبۇلدىڭ سيليۆري اۋدانىنداعى تۇرمەگە جەتكىزىلدى، دەپ جازادى تاسس.
يماموگلۋ سوت پروتسەسى ۋاقىتىندا سول جەردە بولادى. مەر جانە باسقا دا ايىپتالۋشىلاردىڭ تۇرمەگە جەتكىزىلگەنى تۇسىرىلگەن كادرلار A haber تەلەارناسىندا تىكەلەي ەفيردە كورسەتىلدى.
تۇرمەگە كىرەبەرىستە پوليتسيا قورشاۋلارى ورناتىلىپ، كەلگەن بارلىق كولىكتەر مەن جۇرگىزۋشىلەردىڭ، جولاۋشىلاردىڭ قۇجاتتارى تەكسەرىلىپ جاتىر. تۇرمە ماڭىندا پوليتسيانىڭ ارنايى جاساقتارى مەن سۋ اتقىشتارى كەزەكشىلىك ەتۋدە.
ىستامبۇلدىڭ قىلمىستىق سوتى بۇگىن تاڭەرتەڭ يماموگلۋدى بۇلتارتپاۋ شاراسى رەتىندە قاماۋعا الۋ تۋرالى شەشىم شىعاردى. وعان ەكى ءىس بويىنشا - اكىمدىكتەگى «سىبايلاس جەمقورلىق» جانە «تەرروريزمگە كومەكتەسۋ» ايىپتارى تاعىلدى، ءبىراق سىبايلاس جەمقورلىق ىسىنە بايلانىستى قاماۋعا الىندى. تەرروريزم ءىسى بويىنشا يماموگلۋ سوت باقىلاۋىمەن بوساتىلدى. مەرمەن بىرگە 50-گە جۋىق ادام قاماۋعا الىندى، ولاردىڭ اراسىندا قالالىق اكىمدىكتىڭ جوعارى لاۋازىمدى قىزمەتكەرلەرى دە بار.
يماموگلۋ مەن باسقا دا ايىپتالۋشىلار ەكى اپتا ىشىندە بۇلتارتپاۋ شاراسىنا شاعىمدانا الادى. مەردىڭ زاڭگەرلەرى اپپەلياتسيالىق شاعىم تۇسىرمەكشى.
ايتا كەتەيىك، بۇعان دەيىن سىبايلاس جەمقورلىق بويىنشا ايىپتالعان ىستامبۇل مەرى قاماۋعا الىنعانىن حابارلادىق.
