قىسقى ازيادا: حاربيندەگى اتلەتتەر قالاشىعى جايلى نە بىلەمىز
حاربين. KAZINFORM - قىتايدىڭ حاربين قالاسىندا وتەتىن IX قىسقى ازيا ويىندارىنىڭ رەسمي اشىلۋىنا نەبارى 1 كۇن قالدى. harbin2025.com رەسمي سايتىنىڭ حابارلاۋىنشا، 24 ەلدەن كەلگەن 900 دەن اسا سپورتشى Harbin Victories قوناق ۇيىنە (اتلەتتەر قالاشىعى) ورنالاستى.
Harbin Victories Hotel - حاربيندەگى ەڭ تانىمال ءتورت جۇلدىزدى قوناق ۇيلەرىنىڭ ءبىرى. عيماراتتىڭ جالپى اۋدانى 60000 شارشى مەتردى قۇرايدى. 39 قاباتتان تۇراتىن نىساندا 618 قوناق بولمەسى، كونفەرەنسيا زالى، قوعامدىق تاماقتانۋ ورنى، ساۋدا ورتالىعى جانە دەنە شىنىقتىرۋ زالدارى بار.
قوناق ءۇي ديرەكتوردىڭ اتقارۋشى ورىنباسارى مانيننىڭ ايتۋىنشا، قوناق ءۇي مەيرامحاناسى ءبىر ۋاقىتتا 400 ادامدى قابىلداي الادى جانە سپورتشىلارعا تاۋلىگىنە 20 ساعات تاڭعى، تۇسكى، كەشكى جانە تۇنگى اس بەرەدى.
- سپورتشىلاردىڭ تالعامىنا ساي كەلۋ ءۇشىن الدىڭعى ءىس-شارالاردى ۇيىمداستىرۋ تاجىريبەسىمەن جانە ايماقتىق تاعامداردىڭ ەرەكشەلىگىن ەسكەرە وتىرىپ، ءمازىر نەعۇرلىم باي جانە ءارتۇرلى جاسالدى. مىسالى، مەيرامحانا ىستىق تاماق ايماعى، سالقىن تاماق ايماعى جانە سۋسىن ايماعىنا ءبولىنىپ، قىتاي، وڭتۇستىك-شىعىس ازيا، شىعىس ازيا جانە ەۋروپالىق اس ءمازىرى دايىندالدى. سونىمەن قاتار ءتۇرلى ەلدەر مەن ايماقتاردان كەلگەن جانە ءارتۇرلى مادەني-ءدىني نانىمداعى سپورتشىلاردىڭ قاجەتتىلىكتەرىن قاناعاتتاندىرۋ ءۇشىن جەكە حالال تاعام ايماعى اشىلدى، - دەدى مانين.
ونىڭ ايتۋىنشا، ازىق-تۇلىك قاۋىپسىزدىگىنىڭ قامتاماسىز ەتۋ ءۇشىن اتلەتتەر قالاشىعى ازىق-تۇلىكتى پايدالانۋ جانە ساقتاۋ، تاسىمالداۋ، اس ءۇي تازالىعى جانە تاماقتانۋ پروتسەسىن ءجىتى قاداعالايدى.
سپورتشىلاردىڭ جارىستان كەيىنگى تىنىعۋىن قامتاماسىز ەتۋ ماقساتىندا، بولمەلەردى بارىنشا كەڭ جانە جارىق ەتىپ قويعان. ءار بولمە جايلى توسەك ورىن، ۇستەل جانە باسقا دا جيھازدارمەن، سونداي-اق ىلعالداندىرعىش، جەكە دارەتحانا، دۋش، قولجۋعىش سياقتى قۇرالدارمەن جابدىقتالعان.
مانيننىڭ ايتۋىنشا، اتلەتتەر قالاشىعى حالقارالىق ستاندارتتارعا ساي جابدىقتالعان. مۇندا سپورتشىلارعا مەديتسينالىق كومەك كورسەتۋ ءۇشىن ارنايى مەدپۋنكت جاساقتالعان. بۇل جەردە ىشكى اۋرۋلار، حيرۋرگيا، ۋدز جانە ءدارىحانا سياقتى 8 ءبولىم بار ەكەنىن كورۋگە بولادى. مەدپۋنكت مەديتسينالىق جابدىقتارمەن تولىق قامتاماسىز ەتىلىپ، 56 مەديتسينا قىزىمەتكەرى سپورتشىلاردىڭ دەنساۋلىعىن ءسات سايىن قاداعالاپ وتىرادى.
اتلەتتەر قالاشىعىندا سونداي-اق بۇقارالىق اقپارات ورتالىعى، دەلەگاتسيا باسشىلارىنا ارنالعان ءماجىلىس زالى، وسا كەڭسەسى، دوپينگ-باقىلاۋ پۋنكتى، مەديتاتسيا بولمەسى جانە باسقا دا فۋنكسيونالدىق ايماقتار بار.
ايتا كەتەيىك، IX قىسقى ازيا ويىندارى 2025-جىلدىڭ 7-14-اقپانى ارالىعىندا قىتاي حالىق رەسپۋبليكاسى حەيلۋنتسزيان پروۆينتسياسىنىڭ حاربين قالاسىندا وتەدى. سپورتشىلار 11 سپورت ءتۇرى بويىنشا 64 مەدال جيىنتىعىن ساراپقا سالادى.
اۆتور مۇحتار قاليموللا ۇلى
