پيروتەحنيكا ونىمدەرىن زاڭسىز ساۋدالاپ جۇرگەندەر ايىپپۇل ارقالاپ جاتىر
پاۆلودار. KAZINFORM - وڭىردە «پيروتەحنيكا» جەدەل-پروفيلاكتيكالىق ءىس-شاراسى وتكىزىلۋدە. ءتارتىپ ساقشىلارى ساۋدا نۇكتەلەرىنە مونيتورينگ جۇرگىزىپ، زاڭسىز ونىمدەردى تاركىلەپ جاتىر.
جاڭا جىل مەرەكەسى جاقىنداعان تۇستا جەر-جەرلەردە پيروتەحنيكالىق ونىمدەردىڭ زاڭسىز ساۋداسى بەلەڭ الاتىنى جاسىرىن ەمەس. تۇرعىنداردىڭ قاۋىپسىزدىگىن نىساناعا العان پاۆلودارلىق پوليتسەيلەر زاڭسىز دەرەكتەردىڭ الدىن الۋ ماقساتىندا پروفيلاكتيكالىق ءىس-شارالاردى باستاپ كەتتى. ولار دۇكەندەر، ساۋدا ۇيلەرى مەن پيروتەحنيكالىق ونىمدەردى ساتۋعا بولاتىن ورىندار بويىنشا رەيدتەر جۇرگىزىپ، رۇقسات بەرۋ قۇجاتتارىن تەكسەرۋدە. كاسىپكەرلەر مەن ساتۋشىلارعا ءونىمدى كامەلەتكە تولماعاندارعا ساتۋعا تىيىم سالىناتىنىن جانە جارىلىس قاۋپى بار بۇيىمداردى زاڭسىز وتكىزگەنى ءۇشىن جاۋاپكەرشىلىك بارىن ەسكەرتىپ كەلەدى.
- ءتارتىپ ساقشىلارى الەۋمەتتىك جەلىلەرگە مونيتورينگ جۇرگىزەدى. وندا كەيبىر ازاماتتار پيروتەحنيكالىق ونىمدەردى ونلاين ساتاتىنى انىقتالدى. پاۆلوداردا بايجانوۆ كوشەسىندە رۇقسات قۇجاتتارىسىز پيروتەحنيكالىق بۇيىمداردى ساتۋ دەرەگى انىقتالدى. ساتۋشىدان 45 جاعۋ زاتى بار 4 قوراپ تاركىلەندى. تاۋارلاردى زاڭسىز ساتقانى ءۇشىن ساتۋشى قىزمەتكەر جاۋاپقا تارتىلىپ، 25-ايلىق ەسەپتىك كورسەتكىش مولشەرىندە ايىپپۇل سالىندى، - دەپ حابارلادى پاۆلودار وبلىسى پوليتسيا دەپارتامەنتىنىڭ باسپا ءسوز قىزمەتىنەن.
پوليتسەيلەر وت-شاشۋلاردى ساتىپ الۋ كەزىندە ساتۋشىدان ءونىم سەرتيفيكاتىن تالاپ ەتۋ كەرەكتىگىن ەسكەرتەدى. پيروتەحنيكالىق ونىمدەردىڭ سىرتىندا نەمەسە قورابىندا پايدالانۋ نۇسقاۋلىعى مىندەتتى تۇردە بولۋى كەرەك. ەگەر ءونىمنىڭ جارامدىلىق مەرزىمى ءوتىپ كەتسە، ونى پايدالانباعان ابزال.
ماماندار پيروتەحنيكالىق بۇيىمداردى قالتادا الىپ جۇرۋگە، بولشەكتەۋگە، ۇيكەلەۋگە جانە ىستىق جەردە كەپتىرۋگە كەپتىرۋگە بولمايتىنىن ايتادى. اتا-انالار وت-شاشۋدى بالالارىنىڭ باقىلاۋسىز پايدالانۋىنا تىيىم سالۋى قاجەت.
مۇرات اياعان
