يران مەن ەۋروپالىق وداقتىڭ ءۇش ەلى سانكسيالاردى جويۋ تۋرالى كەلىسسوز باستادى

بۇل تۋرالى Kazinform ءتىلشىسى يران سىرتقى ىستەر مينيسترلىگىنە سىلتەمە جاساپ حابارلادى.

- بۇگىن جەنەۆادا يران مەن ەۋروپانىڭ ءۇش مەملەكەتى اراسىندا كەلىسسوزدەر ءجۇرىپ جاتىر. ولار ءبىرقاتار ماسەلەنى قامتيدى جانە كەلىسسوز ەرتەڭ دە جالعاسادى، - دەدى اپتالىق بريفينگىدە يران سىرتقى ىستەر مينيسترلىگىنىڭ باسپا ءسوز حاتشىسى ەسمايل باگاي.

ول سونداي- اق تالقىلاۋ ەكى سالاعا ارنالعانىن اتاپ ءوتتى.

- تالقىلاۋ كەلىسىمگە كەلۋ ءۇشىن ماڭىزدى سانكسيالاردى جويۋ جانە يادرولىق سالاعا ارنالدى. IRNA اقپارات اگەنتتىگى سىرتقى ىستەر ءمينيسترىنىڭ ورىنباسارى كازەم گاريباباديدىڭ سوزىنە سىلتەمە جاساپ: «كەلىسسوزدەردى قايتا باستاۋ كەرەك جانە بارلىق تاراپ كەلىسىمگە كەلۋ ءۇشىن قولايلى اتموسفەرانى جاساپ، قولداۋى كەرەك» دەگەن كونسەنسۋسقا قول جەتكىزىلگەنىن حابارلادى، - دەدى ول.

ديپلومات كەلىسسوزدەر اشىق ءارى سىندارلى وتكەنىن جانە ءارى قاراي جالعاساتىنىن اتاپ ءوتتى. وتكەن قاراشا ايىندا يران سىرتقى ىستەر ءمينيسترىنىڭ ورىنباسارلارى مادجيد تاحت- راۆانچي مەن كازەم گاريبابادي جەنيەۆادا ۇلى بريتانيا، گەرمانيا جانە فرانسيا وكىلدەرىمەن كەزدەسىپ، تەگەراننىڭ يادرولىق باعدارلاماسىن تالقىلادى.

بۇعان دەيىن يران سىرتقى ىستەر ءمينيسترى ابباس اراگچي نيۋ- يوركتەگى ب ۇ ۇ باس اسسامبلەياسىنىڭ وتىرىستارىنا قاتىسۋ كەزىندە يراننىڭ يادرولىق كەلىسىم بويىنشا كەلىسسوزدەردىڭ جاڭا كەزەڭىن باستاۋعا دايىن ەكەنىن مالىمدەگەن.

ديپلومات كەيىنىرەك بۇل ۇستانىمىن قىتايدىڭ CCTV China تەلەارناسىنا بەرگەن سۇحباتىندا راستادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى