يران مەن ا ق ش يادرولىق باعدارلاما بويىنشا ومان استاناسىندا كەلىسسوزدى باستادى
استانا. KAZINFORM - كەلىسسوزدەر وڭىرلىك شيەلەنىستى باسەڭدەتۋگە باعىتتالعان. بۇل تۋرالى Kazinform اگەنتتىگىنىڭ مەنشىكتى ءتىلشىسى حابارلايدى.
12-ءساۋىر كۇنى وماننىڭ استاناسى ماسكات قالاسىندا يران يسلام رەسپۋبليكاسى مەن امەريكا قۇراما شتاتتارىنىڭ وكىلدەرى اراسىندا كەلىسسوز باستالدى. تاراپتار يراننىڭ يادرولىق باعدارلاماسىنا قاتىستى ماسەلەلەردى تالقىلاۋدا. اتالعان كەزدەسۋ وڭىردەگى شيەلەنىستىڭ ءورشي تۇسۋىمەن بايلانىستى ءوتىپ جاتىر.
IRNA اقپارات اگەنتتىگىنىڭ حابارلاۋىنشا، يران دەلەگاتسياسى سىرتقى ىستەر ءمينيسترى ابباس اراگچيدىڭ باسشىلىعىمەن تاڭەرتەڭ تەگەراننان ماسكاتقا ۇشىپ شىققان. ماسكاتقا كەلگەننەن كەيىن اراگچي ومان سۇلتاناتىنىڭ جوعارى لاۋازىمدى وكىلدەرىمەن كەزدەسۋ وتكىزدى.
- يران دەلەگاتسياسى سىرتقى ىستەر ءمينيسترى ابباس اراگچيدىڭ جەتەكشىلىگىمەن يران مەن ا ق ش اراسىنداعى كەلىسسوزدەردىڭ وتەتىن ورنى - ماسكاتقا جول تارتتى، - دەپ حابارلادى IRNA اگەنتتىگى.
Tasnim اگەنتتىگىنىڭ مالىمەتىنشە، كەلىسسوز جاناما تۇردە وتەدى جانە وماننىڭ سىرتقى ىستەر ءمينيسترى بادر بين حاماد ءال-بۋسايدي اراعايىندىق ەتەدى. كونسۋلتاتسيانىڭ العاشقى كەزەڭى تۇستەن كەيىن اتالعان مينيسترمەن باستالماق.
كەلىسسوزدە اقش تاراپىنان پرەزيدەنتتىڭ تاياۋ شىعىس بويىنشا ارنايى وكىلى ستيۆ ۋيتكوفف قاتىسىپ جاتىر. ۆاشينگتون يراننىڭ يادرولىق باعدارلاماسىنىڭ اسكەري باعىتتارىنان باس تارتۋعا كەپىلدىك بەرۋدى تالاپ ەتەدى. اق ءۇيدىڭ باسپا ءسوز حاتشىسى كەرولاين ليۆيتتىڭ ايتۋىنشا، ا ق ش «ديپلوماتياعا دايىن، الايدا ەگەر كەلىسىمگە قول جەتكىزىلمەسە، قىسىم شارالاردى جوققا شىعارمايدى».
ال يران ءوز كەزەگىندە «ناقتى جانە اشىق ديالوگقا دايىن ەكەنىن» اتاپ ءوتتى.
- ءبىز شىنايى تۇردە جانە سەرگەكتىكپەن ديپلوماتياعا ناقتى مۇمكىندىك بەرىپ وتىرمىز. ا ق ش بۇل شەشىمدى باعالاۋى ءتيىس، ويتكەنى شەشىم ولاردىڭ قاتاڭ ريتوريكاسىنا قاراماستان قابىلداندى، - دەدى يران يسلام رەسپۋبليكاسىنىڭ سىرتقى ىستەر مينيسترلىگىنىڭ رەسمي وكىلى ەسمايل باعاي.
ومان ءداستۇرلى تۇردە تەگەران مەن ۆاشينگتون اراسىنداعى بەيتاراپ دەلدال ءرولىن اتقارىپ كەلەدى. قازىرگى كەلىسسوز شيەلەنىستى سەيىلتۋگە جانە يادرولىق، سونداي-اق وڭىرلىك ماسەلەلەر بويىنشا كەڭ اۋقىمدى ديپلوماتيانى قايتا باستاۋعا ىقتيمال قادام رەتىندە قاراستىرىلىپ وتىر.
سونىمەن قاتار بۇل كونسۋلتاتسيالار تاياۋ شىعىستاعى داعدارىستىڭ ۋشىعۋى جاعدايىندا وتۋدە. وعان گازا سەكتورىندا جانە وڭتۇستىك ليۆاندا جالعاسىپ جاتقان اسكەري قاقتىعىستار، سونداي-اق يران مەن يزرايل اراسىنداعى ءوزارا قاۋىپ-قاتەرگە سەبەپ. وسى ورايدا، تەگەران وڭىردەگى ا ق ش بازالارىنا قاتىستى «اۋىر سالدارى» بولاتىنى تۋرالى ەسكەرتۋ جاسادى.
ايتا كەتسەك، كەلىسسوزدەن بىرەر كۇن بۇرىن ا ق ش يرانعا قارسى جاڭا سانكسيالار ەنگىزگەن ەدى.
سونداي-اق Kazinform ءتىلشىسى «ا ق ش پەن يران: جاڭا ستراتەگيا جولى قايسى» تاقىرىبىن جان-جاقتى تالداپ كوردى.
