يران ءۇش امەريكالىق ساربازدىڭ ءومىرىن قيعان شابۋىلعا قاتىسى جوق ەكەنىن مالىمدەدى
استانا. KAZINFORM - يران يوردانيادا ءۇش امەريكالىق اسكەري قىزمەتكەر قازا تاۋىپ، ونداعان ادام جاراقات العان ۇشقىشسىز باسقارىلاتىن ۇشاق شابۋىلىنا قاتىسى بارىن جوققا شىعاردى، دەپ حابارلايدى IRNA اقپارات اگەنتتىگى.
تەگەراننىڭ مالىمدەۋىنشە، يوردانيا- سيريا شەكاراسى ماڭىنداعى ماتەريالدىق- تەحنيكالىق بازاعا جاسالعان شابۋىلعا ونىڭ ەشقانداي قاتىسى جوق.
«بۇعان دەيىن ءمالىم ەتكەنىمىزدەي، ايماقتاعى قارسىلاسۋ توپتارى سيونيستىك رەجيمنىڭ بالالاردى ءولتىرىپ جاتقان سوعىس قىلمىستارى مەن گەنوتسيدىنە جاۋاپ بەرۋدە جانە ولار يران يسلام رەسپۋبليكاسىنىڭ بۇيرىقتارىنا باعىنباي وتىر. بۇل توپتار ءوز ۇستانىمدارى مەن باسىمدىقتارىنا، سونداي-اق ءوز ەلى مەن حالقىنىڭ مۇددەسىنە سۇيەنە وتىرىپ شەشىم قابىلدايدى جانە ارەكەت ەتەدى»، - دەپ مالىمدەدى يران سىرتقى ىستەر مينيسترلىگىنەن.
بۇعان دەيىن ا ق ش پرەزيدەنتى دجو بايدەن مەن ۇلى بريتانيا سىرتقى ىستەر ءمينيسترى دەۆيد كەمەرون يران قولدايتىن توپتار ءبىر كۇن بۇرىن يوردانيا مەن سيريا شەكاراسىندا ورنالاسقان ا ق ش اسكەرىنە شابۋىل جاسادى دەپ ايىپتادى.
شابۋىلدان ءۇش امەريكالىق سارباز قازا تاۋىپ، ونداعان ادام جاراقات العان.
امەريكانىڭ سەگىز ساربازى كۇردەلى مەديتسينالىق كومەك الۋ ءۇشىن يوردانيادان ەۆاكۋاتسيالاندى، ءبىراق ولاردىڭ جاعدايى تۇراقتى، دەپ حابارلايدى Reuters.
بايدەن وڭتۇستىك كاروليناداعى سايلاۋالدى شارا كەزىندە يوردانيادا قازا تاپقان ءۇش اسكەري قىزمەتكەردى ءبىر مينۋت ۇنسىزدىكپەن ەسكە الۋدى سۇراپ، «ءبىز جاۋاپ بەرەمىز» دەپ قوستى. ا ق ش قورعانىس ءمينيسترى للويد وستين بۇل سوزدەردى قايتالادى.
يراننىڭ ب ۇ ۇ- داعى ميسسياسى جەكسەنبى كۇنى كەشكە يراننىڭ ا ق ش بازاسىنا جاسالعان شابۋىلعا ونىڭ ەش قاتىسى جوق ەكەنىن مالىمدەدى.
يران س ءى م رەسمي وكىلى ناسسەر كانااني دە ۇلى بريتانيانىڭ يراندى ايماقتاعى قارسىلاسۋ توپتارىنىڭ يوردانياداعى ا قش بازاسىنا شابۋىل جاساۋ وپەراتسياسىنا قاتىسقانى تۋرالى ايىپتاۋىن نەگىزسىز دەپ اتادى.
يەمەندىك حۋسيتتەر مەن پالەستينانىڭ حاماس توبى شابۋىلعا قاتىستى پىكىرىن ءبىلدىردى.
«يوردانيانىڭ سولتۇستىك- شىعىسىنداعى اسكەري بازاعا شابۋىل-اراب الەمىندە امەريكا ساياساتىنا نارازىلىقتىڭ ايقىن بەلگىسى»، - دەپ مالىمدەدى يەمەننىڭ جوعارى ساياسي كەڭەسىنىڭ مۇشەسى موحاممەد ءالي ءال-حۋسي.
ونىڭ ايتۋىنشا، ا ق ش ءوز بازاسىنا جاسالعان شابۋىلدىڭ ءمانىن ءتۇسىنۋى ءتيىس.
«امەريكالىق ءۇش ساربازدىڭ ءولتىرىلۋى-بۇل ا ق ش باسشىلىعىنا گازاداعى بەيكۇنا جانداردى ءولتىرۋ توقتاتىلمايىنشا وعان بۇكىل (مۇسىلمان) ۇلتقا قارسى تۇرۋعا تۋرا كەلەدى دەگەن بەلگى»، - دەپ مالىمدەدى ءوز كەزەگىندە حاماس ساياسي بيۋروسىنىڭ مۇشەسى سامي ءابۋ زۋحري.
