يران ا ق ش-تىڭ كەمە قاتىناسىنا قاتىستى جاڭا سانكسيالارىن ايىپتادى
استانا. KAZINFORM - يران سىرتقى ىستەر مينيسترلىگى ا ق ش- تىڭ مۇناي ونەركاسىبىنە قارسى جاڭا سانكسيالارى نەگىزسىز جانە حالىقارالىق ستاندارتتارعا قايشى دەپ سانايدى، دەپ جازادى قازاقپاراتتىڭ مەنشىكتى ءتىلشىسى.
IRNA اقپارات اگەنتتىگىنىڭ حابارلاۋىنشا، يران جۇما كۇنى ۆاشينگتوننىڭ كەمە قاتىناسىنا قاتىستى سانكسيالار ەنگىزۋ تۋرالى شەشىمىن ايىپتاپ، بۇل ونىڭ سەرىكتەستەرىمەن زاڭدى ساۋدا جاساۋىنا كەدەرگى كەلتىرەتىنىن مالىمدەدى.
- ا ق ش جاڭا اكىمشىلىگىنىڭ يراننىڭ ەكونوميكالىق سەرىكتەستەرىمەن زاڭدى ساۋداسىنا كەدەرگى جاساۋ ارقىلى يران حالقىنا قىسىم جاساۋ تۋرالى شەشىمى زاڭسىز، - دەدى يران سىرتقى ىستەر مينيسترلىگىنىڭ باسپا ءسوز حاتشىسى ەسمايل باگاي.
ا ق ش قارجى مينيسترلىگى بەيسەنبى كۇنى جىل سايىن قىتايعا ميلليونداعان باررەل يران مۇنايىن جەتكىزۋگە كومەكتەسەتىن بىرنەشە ۇيىمعا، جەكە تۇلعالارعا جانە تانكەرلەرگە جاڭا سانكسيالار سالاتىنىن مالىمدەدى.
بۇل ا ق ش پرەزيدەنتى دونالد ترامپ وسى اپتادا تەگەرانعا «ەڭ جوعارعى قىسىم» كورسەتۋ تۋرالى مەموراندۋمعا قول قويىپ، يراننىڭ شيكى مۇناي ەكسپورتىن نولگە دەيىن تومەندەتۋگە ۋادە بەرگەننەن كەيىن يران مۇنايىنا قاتىستى ا ق ش ەنگىزگەن العاشقى سانكسيالار بولىپ تابىلادى. بۇل قادام يسلام رەسپۋبليكاسىنىڭ يادرولىق الەۋەتىن شەكتەۋ ارەكەتتەرىنىڭ ءبىر بولىگى رەتىندە قاراستىرىلۋدا.
ا ق ش قارجى مينيسترلىگى سونداي-اق يران مۇناي ساتۋدان تۇسكەن قارجىنى يادرولىق باعدارلاماسىن دامىتۋعا ينۆەستيتسيالاۋعا جانە كورشىلەس ەلدەردەگى تەرروريزمدى قولداۋعا جۇمسايدى دەپ مالىمدەيدى.
اۆتور
ەركەجان سماعۇلوۆا
