ىقىلىقتان قالاي جىلدام ارىلۋعا بولادى؟

ادامنىڭ نەگىزگى تىنىس الۋ بۇلشىقەتى ديافراگما دەپ اتالادى. كەنەتتەن بۇلشىقەت تارىلعان كەزدە ادامنىڭ تىنىس الۋ ىرعاعى بۇزىلادى. ناتيجەسىندە ول سىرتقا ىقىلىق رەتىندە شىعادى.

ءبىز اسىعىس تاماق ىشكەن كەزدە، بۇلشىقەتتەگى جۇيكە جۇيەسىنىڭ تالشىقتارى قىسىلادى دا، قوزۋ ءۇردىسى جۇرەدى. بۇل ەففەكت سالقىن تەمپەراتۋرالى جەردە نەمەسە قورىققان كەزدە كەنەتتەن ىشكە تىنىس العانىمىزدا دا بايقالادى. جۇيكەنىڭ قىسىلۋىنا اعزا جىلدام جاۋاپ بەرەدى: ول ورتالىق جۇيكە جۇيەسىنە بەلگى جىبەرەدى، ال اعزا قورعانۋ ءۇشىن وزدىگىنەن ديافراگمانى قىسادى. وسىلايشا، اعزامىزدىڭ بار ارەكەتىنە جاۋاپتى جۇيكە جۇيەسىنىڭ تالشىقتارىن بوساتامىز. ياعني، ىقىلىق - اعزانىڭ قورعانىش رەاكسياسى.

فيزيولوگتار ديافراگراممانىڭ قىسىلۋىن نە تۋدىراتىنىن بارلىق كەزدە بىردەي تۇسىنە بەرمەيدى. ونىڭ سەبەپتەرى وتە كوپ: بايقاماي اۋا جۇتىپ قويۋدان باستاپ قاۋىپتى جۇيكە اۋرۋلارىنا دەيىن. جالپى ىقىلىق ومىرگە قاۋىپتى ەمەس، ءبىراق ول جاعىمسىزدىق سىيلايتىنى راس. ىقىلىق تيگەندە تاماق ءىشۋ جانە سۋ ءىشۋ، ۇيىقتاۋ قيىنعا سوعادى.

ىقىلىقتان قالاي ارىلۋعا بولادى؟

ادەتتە ىقىلىق وزدىگىنەن كەتەدى. ول بىرنەشە مينۋتتان بىرنەشە ساعاتقا دەيىن سوزىلۋى مۇمكىن. ىقىلىقتان جىلدام ارىلۋ ءۇشىن مىنا ادىستەردى بايقاپ كورىڭىز:

10-20 سەكۋند دەمالماڭىز. سودان سوڭ جايلاپ تىنىسىڭىزدى شىعارىڭىز. قاجەت بولسا، قايتالاڭىز؛

قاعاز پاكەتكە تىنىس الىڭىز. شاعىن قاعاز پاكەت الىپ، ونىمەن مۇرنىڭىز بەن اۋزىڭىزدى جاۋىپ، باياۋ تىنىس الىڭىز. پاكەت ءۇرىلۋى جانە بوساۋى كەرەك؛

تىزەڭىزدى قۇشاقتاڭىز. ىڭعايلى جەرگە وتىرىپ، تىزەڭىزدى قۇشاقتاڭىز؛

ءبىر ستاقان سۋىق سۋ ءىشىڭىز. سۋدى جىلدام ءىشىڭىز. سونداي-اق قۇلاعىڭىزدى جاۋىپ، سۋدى تۇتىكشەمەن ىشۋگە بولادى؛

مۇز سورىڭىز. مۇزدى بىرنەشە مينۋت سورىپ، ول كىشىرەيگەن كەزدە ونى جۇتىپ قويىڭىز؛

وتكىر ءدامى بار بىردەڭە جەڭىز. مىسالى، ليمون نەمەسە قىزاناق؛

قۇسۋ رەفلەكسىن شاقىرىڭىز. ول ءۇشىن اۋزىڭىزعا ساۋساعىڭىزدى سالىپ، ءتىلدىڭ تۇپكى جاعىن باسۋعا بولادى؛

ءتىلىڭىزدى شىعارىڭىز. ءتىلىڭىزدى سىرتقا بارىنشا شىعارىپ، قولىڭىزبەن استىعا قاراي تارتۋعا بولادى؛

وتكىر ءيىسى بار نارسەنى يىسكەڭىز. مىسالى، سپيرت؛

باسقا نارسەگە الاڭداڭىز. كەيدە ىقىلىقتان ارىلۋ ءۇشىن ول جايلى ويلاماۋ كەرەك. مىسالى، ەسەپ شىعارىڭىز.

massaget.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى