گۆينەياداعى ستاديوندا جاپپاي توبەلەس بولىپ، جۇزگە جۋىق ادام قازا تاپتى
استانا. KAZINFORM - گۆينەيانىڭ وڭتۇستىك-شىعىسىنداعى نزەرەكور قالاسىندا فۋتبول ماتچىندا جانكۇيەرلەر اراسىندا جاپپاي توبەلەس شىعىپ، ونداعان ادام قازا تاپتى. بۇل تۋرالى Report اگەنتتىگى AFP-عا سىلتەمە جاساپ حابارلادى.
اقپاراتقا سايكەس، وقيعاعا تورەشىنىڭ قىزىل قاعاز كورسەتىپ، كەيىن كوماندالاردىڭ بىرىنە پەنالتي بەلگىلەگەن داۋلى شەشىمدەرى سەبەپ بولعان، سودان كەيىن جانكۇيەرلەر توبەلەسىپ كەتكەن.
ولاردى اجىراتۋ ءۇشىن پوليتسيا كوزدەن جاس اعىزاتىن گاز قولدانعان. ودان قاشۋعا تىرىسقان جانكۇيەرلەر ستاديوننان سىرتقا قاراي اسىعىپ، شىعابەرىستەردە كەپتەلىس پايدا بولدى. كوبىسى تۇنشىعىپ نەمەسە سىرتقا شىقپاق بولعان كەزدە ستاديون قابىرعالارىنان قۇلاپ كوز جۇمعان.
قۇربانداردىڭ ءدال سانىن ايتۋ ازىرگە قيىن، مايىتتەردى تولىق انىقتاۋ جۇمىستارى جۇرگىزىلۋدە، دەلىنگەن حاباردا.
- ول جەردە 100-گە جۋىق ءولى دەنە بار. كەيبىرەۋلەر دالىزدەردە جانە ەدەندە جاتىر. ءمايىتحانا تولىپ كەتتى، - دەدى دارىگەرلەردىڭ ءبىرى AFP اگەنتتىگىنە.
اۆتور
جاراسقان نۇرىبايەۆ
