ينتەرنەت-الاياقتارعا اتىراۋلىقتار 400 ميلليون تەڭگە بەرىپ قويعان
اتىراۋ. KAZINFORM - اتىراۋ وبلىسىندا بىلتىر 747 ينتەرنەتتەگى الاياقتىق قىلمىسى تىركەلگەن. اتىراۋلىقتار الاياقتارعا 400 ميلليون تەڭگەگە جۋىق قارجىسىن بەرگەنى انىقتالىپ وتىر.
وبلىستىق كريمينالدىق پوليتسيا باسقارماسى كيبەر قىلمىسقا قارسى كۇرەس توبىنىڭ اعا جەدەل ۋاكىلى اسحات نۇرمانوۆتىڭ ايتۋىنشا، بانك سالاسىنا قاتىستى الاياقتاردى قۇرىقتاۋعا قيىندىق تۋدىرعان.
«بىلتىر ينتەرنەتتەگى الاياقتىققا بايلانىستى 104 قىلمىستىق سوتقا جولداندى. ال، 276 قىلمىستىق ءىس ءوزارا كەلىسىمگە بايلانىستى قىسقارتىلدى. جابىرلەنۋشىلەردىڭ اراسىندا الەۋمەتتىك مارتەبەسى ءارتۇرلى ادامدار بار. ونىڭ ىشىندە بيۋجەت سالاسىنىڭ قىزمەتكەرلەرى، مەملەكەتتىك قىزمەتشىلەر، زەينەتكەرلەر، ءتىپتى جەكە كاسىپكەرلەر دە بار. وتكەن جىلى الاياقتار اتىراۋلىقتارعا شامامەن 400 ميلليون تەڭگەگە جۋىق شىعىن كەلتىردى»، - دەيدى اسحات نۇرمانوۆ.
ونىڭ ايتۋىنا قاراعاندا، ەڭ ءجيى كەزدەسەتىن الداۋ ءتۇرى - ينتەرنەت ارقىلى «جوق تاۋارلاردى» ساتۋ نەمەسە قىزمەت كورسەتۋ كەزىندە الدىن الا تولەم الۋ. بانك قىزمەتكەرلەرىنىڭ اتىنان قوڭىراۋ سوعاتىن الاياقتار دا كوپ. ونلاين- قارىزداردى رەسىمدەۋ ارقىلى جاسالاتىن قىلمىستىڭ ۇلەسى ءۇشىنشى ورىندا تۇر. سوندىقتان، قۇقىق قورعاۋشىلار تۇرعىندارعا ءارقاشان ساق بولۋ قاجەتتىگىن، كەز- كەلگەن قوڭىراۋ مەن حابارلاماعا الدانىپ قالاۋ كەرەكتىگىن ەسكەرتەدى.
ەسكە سالا كەتەلىك، بۇعان دەيىن اتىراۋدا 27 جاستاعى جىگىت تۇرعىنداردى ايەل داۋسىمەن الداعانىن حابارلاعان بولاتىنبىز.
