ينۆەستورلار كوبىنە قاي ماسەلەلەر بويىنشا شاعىمدانىپ وتىر

- ەلىمىزدە ينۆەستورلاردىڭ قۇقىقتارى مەن مۇددەلەرىن قورعاۋ زاڭنامالىق دەڭگەيدە قامتاماسىز ەتىلگەن. ينۆەستورلار ءوز قۇقىقتارى مەن مۇددەلەرىن قورعاۋ ءۇشىن قازاقستان سوتتارىنا، سونداي-اق حالىقارالىق تورەلىك سوتتارعا جۇگىنۋگە قۇقىلى. ولار ءۇشىن سالىق جەڭىلدىكتەرى، ينۆەستيتسيالىق سۋبسيديالار مەن كەپىلدىكتەر سەكىلدى مەملەكەتتىك قولداۋدىڭ بىرنەشە ءتۇرى قاراستىرىلعان.

ەلىمىزدە ينۆەستورلاردىڭ قۇقىقتارىن قورعاۋ ينۆەستيتسيالىق قىزمەتتىڭ دامۋى ءۇشىن تۇراقتى جانە قولايلى جاعدايلار جاساۋعا، تەڭ قۇقىقتاردى قامتاماسىز ەتۋ مەن ەكونوميكالىق ءوسۋىن ىنتالاندىرۋعا باعىتتالعان. دەگەنمەن بۇل سالادا بەلگىلى ءبىر پروبلەمالار دا جوق ەمەس. ايتا كەتەتىن بولساق، جوعارعى سوتى اكىمشىلىك ىستەر جونىندەگى سوت القاسىنىڭ مالىمەتى بويىنشا 2024 -جىلى اكىمشىلىك سوتقا ينۆەستورلاردان 200-دەي تالاپ ارىز كەلىپ ءتۇستى. ولاردىڭ كوپ بولىگى سالىق ماسەلەسى بويىنشا قارجى مينيسترلىگى مەن جەر قويناۋىن يگەرۋ ماسەلەسى بويىنشا ونەركاسىپ جانە قۇرىلىس مينيسترلىگىنە قاتىستى بولىپ وتىر، - دەدى ن. بەكنازاروۆ.

ونىڭ ايتۋىنشا، ينۆەستورلار باسقا مەملەكەتتىك ورگاندار تاراپىنان قولداۋ تاپپاي، ماسەلەلەرى شەشىلمەگەندىكتەن، سوتقا جۇگىنۋگە ءماجبۇر بولادى. ءىس جۇزىندە مۇنداي ىستەر ءجيى كەزدەسەدى، ءبىراق ولار سوتقا جەتپەيدى. مينيسترلىكتەر ولاردى سوتقا دەيىن شەشۋگە تىرىسادى. جوعارعى سوتتا ينۆەستورلاردىڭ پايداسىنا ىستەردىڭ 80 پايىزى شەشىلەدى.

دەپۋتاتتىڭ پايىمىنشا، شەتەلدىك ينۆەستورلاردىڭ قۇقىقتارىن ساقتاۋ قازاقستاننىڭ سەنىمدى ارىپتەس رەتىندەگى وڭ حالىقارالىق يميدجىن قالىپتاستىرۋ ءۇشىن ماڭىزدى فاكتور سانالادى. بىرىنشىدەن، زاڭنامانىڭ تۇراقتىلىعى، اسىرەسە سالىق سالۋ جانە ينۆەستيتسيالاردى رەتتەۋ بولىگىندە قامتاماسىز ەتىلۋى قاجەت. بۇل رەتتە، زاڭناما انىق جانە تۇسىنىكتى بولۋعا ءتيىس.

زاڭنامالىق اكتىلەردە ەكى ءتۇرلى تۇسىنىستىك پەن قايشىلىقتارعا جول بەرمەۋ، سونداي-اق ولاردىڭ جەرگىلىكتى جەرلەردە دۇرىس ىسكە اسىرىلۋىن قامتاماسىز ەتۋ قاجەت.

- مەملەكەتتىك ورگاندار، لاۋازىمدى ادامدار قىزمەتىنىڭ اشىقتىعىن قامتاماسىز ەتۋ جانە ولاردىڭ جاۋاپكەرشىلىگىن كۇشەيتۋ ماسەلەسى نازاردان تىس قالمايدى. ينفراقۇرىلىمدى دامىتۋ ماسەلەسى ماڭىزدى ماسەلە بولىپ قالا بەرەدى. جالپى العاندا، قازاقستاندا ينۆەستورلاردىڭ قۇقىقتارى مەن زاڭدى مۇددەلەرىن قورعاۋدى جاقسارتۋ زاڭنامانى جەتىلدىرۋدى، سىبايلاس جەمقورلىققا قارسى كۇرەستى، قولايلى ينۆەستيتسيالىق احۋال قۇرۋدى جانە داۋلاردى شەشۋدىڭ بالامالى تاسىلدەرىن دامىتۋدى قامتيتىن كەشەندى شارالاردى تالاپ ەتەدى. شەتەلدىك كاپيتالدى تابىستى تارتۋ ءۇشىن ينۆەستورلاردى قولداۋ مەن قورعاۋدىڭ ءتيىمدى جۇيەسىن قۇرۋ قاجەت ەكەنىن اتاپ وتكەن ءجون، - دەدى سەناتور.

ەسكە سالساق، جاقىندا جوعارعى سوت ءتوراعاسى اسلامبەك مەرعاليەۆ ينۆەستورلاردى زاڭ تالاپتارىن ساقتاپ، پاراساتتىلىق تانىتۋعا شاقىردى.

اۆتور

رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى