ينفلياتسيالىق ۇدەرىستەر تۇراقتى تومەندەپ وتىر دەپ ايتۋعا ءالى ەرتە - ۇلتتىق بانك

«قىركۇيەك ايىنىڭ قورىتىندىسى بويىنشا جىلدىق ينفلياتسيا 8,3 پايىزعا دەيىن باياۋلادى. ەستە بولسا، تامىز ايىنداعى كورسەتكىش 8,4 پايىز بولعان ەدى. نەگىزىنەن ول ازىق-تۇلىك كومپونەنتىنىڭ دەزينفلياتسياسىنان پايدا بولدى. ازىق-تۇلىك باعاسىنىڭ ءوسۋى تامىزداعى 5,5 پايىزدان قىركۇيەكتە 5,1 پايىزعا دەيىن باياۋلادى. ال ازىق-تۇلىككە جاتپايتىن تاۋارلار باعاسىنىڭ ءوسۋى 7,7 پايىزدان 7,6 پايىزعا دەيىن باسەڭدەدى. اقىلى قىزمەتتەر ينفلياتسياسى شىلدەدەگى ەڭ جوعارى ماندەردەن (14,5 پايىز) تومەندەپ، ەكى اي قاتارىنان 13,6 پايىز دەڭگەيىندە قالىپتاستى. جالپى سەرۆيستىك ينفلياتسياعا تۇرعىن ءۇي كوممۋنالدىق قىزمەتتەر قۇنىنىڭ ءوسۋى مەن ءبىرقاتار نارىقتىق قىزمەتتەردىڭ قىمباتتاۋى ايتارلىقتاي ۇلەس قوستى»، - دەدى تيمۋر سۇلەيمەنوۆ.

ونىڭ دەرەگىنشە، قىركۇيەكتە ايلىق ينفلياتسيانىڭ ديناميكاسى 0,4 كە دەيىن تومەندەدى. الايدا، ول ورتاشا تاريحي ماندەردەن ءبىرشاما جوعارى بولدى دا، 0,3 پايىز دەڭگەيىندە قالىپتاستى. بازالىق جانە ماۋسىمدىق فاكتورلاردان تازارتىلعان ينفلياتسيا كورسەتكىشتەرى شىلدەدە ايتارلىقتاي جەدەلدەگەننەن كەيىن باياۋلاسا دا، كوكتەم مەن جاز باسىنداعى ەڭ تومەن ماندەردەن ءالى دە جوعارى. ياعني، ينفلياتسيالىق ۇدەرىستەر تۇراقتى تومەندەپ وتىر دەپ ايتۋعا ءالى ەرتە.

«سونىمەن بىرگە، جەكەلەگەن كورسەتكىشتەر ءوندىرىس شىعىندارى ەسەبىنەن باعالارعا قىسىم ارتقانىن كورسەتەدى. وسىلايشا، اۋىل شارۋاشىلىعىندا، ازىق- تۇلىك وندىرىسىندە جانە تاۋارلار يمپورتىندا باعالاردىڭ وسكەنى بايقالىپ وتىر. قىركۇيەكتە حالىقتىڭ ينفلياتسيالىق كۇتۋلەرى 14,1 پايىزعا دەيىن ءوستى. تامىز ول 13,1 پايىز بولعان ەدى. رەسپوندەنتتەر ازىق-تۇلىك، اياق-كيىم مەن كيىم-كەشەك جانە كوممۋنالدىق قىزمەتتەر باعاسىنىڭ وسكەنىن اتاپ ءوتتى. قارجى نارىعىنىڭ كاسىبي قاتىسۋشىلارى بولاشاق ينفلياتسياعا باعا بەرگەندە بايىپتى ۇستانىمدا. ولاردىڭ باعالاۋى بويىنشا ول جىل سوڭىنا دەيىن 8,4 پايىزدى قۇرايدى. بۇل دا ءوسىمدى كورسەتەدى، سەبەبى بۇرىن ولار 8 پايىز شاماسىندا كۇتكەن بولاتىن»، - دەدى ۇ ب ءتوراعاسى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى