ينفلياتسيا 2024-جىلى 8 پايىز تومەندەيدى - ۇلتتىق بانك بولجامى
ۇلتتىق بانك ءتوراعاسى تيمۋر سۇلەيمەنوۆ ينفلياتسيا بويىنشا كەلەر جىلعا بولجام جاسادى، دەپ حابارلايدى Kazinform.
«جىلدىق ينفلياتسيا سوڭعى سەگىز اي بويى تومەندەپ كەلەدى. ونىڭ قازىرگى دەڭگەيى اقپان ايىنداعى (21,3 پايىز) كورسەتكىشتەن 10,8 پايىز ياعني 2 ەسە تومەندەدى. ينفلياتسيانىڭ تومەندەۋىنە سىرتقى ينفلياتسيالىق قىسىمنىڭ السىرەۋى سەبەپ. سونداي-اق ۇكىمەتتىڭ ناقتى شارالارى مەن ۇلتتىق بانك جۇرگىزىپ وتىرعان اقشا-كرەديت ساياساتى ىقپال ەتتى. ازىق-تۇلىك ينفلياتسياسى 10,4 پايىز باياۋلادى. ازىق-تۇلىككە جاتپايتىن تاۋارلار ينفلياتسياسى 11,1 پايىز تومەندەدى. قازان ايىندا قىزمەتتەر باعاسىنىڭ ءوسىمى 11,0 پايىز بولدى»، - دەدى تيمۋر سۇلەيمەنوۆ ءماجىلىستىڭ جالپى وتىرىسىندا.
بانك باسشىسىنىڭ ايتۋىنشا، قازاقستاندا قازىرگى ەكونوميكالىق جاعداي تۇراقتى جانە وڭ ديناميكانى كورسەتىپ وتىر. ونىڭ ىشىندە جالپى ىشكى ءونىم قاڭتار-قىركۇيەك ايلارى ارالىعىندا 4,7 پايىز ارتتى. بيىل نەگىزگى كاپيتالعا سالىنعان ينۆەستيتسيا 9 ايدا 12,1 پايىز وسكەن.
«ءبىزدىڭ بولجام بويىنشا، ينفلياتسيا 2024-جىلدىڭ سوڭىندا 8 پايىز، 2025-جىلى ورتا ەسەپپەن 6 پايىز تومەندەيدى. كەيىن 5 پايىز دەڭگەيىندە ساقتالادى. ۇلتتىق بانك ينفلياتسيانىڭ بىرتىندەپ تۇراقتانىپ كەلە جاتقانىن ەسكەرە وتىرىپ، تامىز بەن قازان ايى ارالىعىندا بازالىق مولشەرلەمەنى، 2 رەت 16,75 پايىزدان 16 پايىزعا دەيىن تومەندەتتى»، - دەدى ول.
