ەگىن دالادا قالمايدى - اۋىل شارۋاشىلىعى ءمينيسترى

اكىمدىكتەردىڭ دەرەكتەرى بويىنشا 16 ميلليون توننا استىق باستىرىلادى دەپ بولجاپ وتىرمىز. مۇمكىن ودان دا كوبىرەك بولار. 16 ميلليون دەپ ەڭ تومەنگى مەجەنى الدىق. بۇگىندە 6 ميلليون توننا استىق باستىرىلدى. ونىڭ 1 ميلليونى ەليەۆاتورعا كىردى. ساپاسى زەرتحانادا تەكسەرىلدى، 80 پايىزى ءۇشىنشى سۇرىپتى. قالعان استىق تا ەلەۆاتورعا كىرگىزىلگەننەن كەيىن ساپاسى تەكسەرىلەدى. جالپى، ءبيداي جەتكىلىكتى بولادى، - دەدى مينيستر ورتالىق كوممۋنيكاتسيالار قىزمەتىندەگى بريفينگتە.

ول ەگىن جيناۋ ناۋقانى قيىن باستالعانىن اتاپ ءوتتى.

ءۇش اپتاداي جاڭبىر جاۋدى. ءبىراز شارۋاشىلىق توقتاپ قالدى. ءبىراق، قازىر ەگىن جيناۋعا كىرىستى، ءبىز دە كومەكتەسىپ جاتىرمىز. ەگىن دالادا قالمايدى دەپ جوسپارلاپ وتىرمىز. ويتكەنى، تەحنيكاسى جەتپەيتىن شارۋاشىلىقتار بولسا، كورشى اۋداننان، كورشى وبلىستان كومباين جىبەرەمىز. ونى باقىلاپ وتىرمىز. شارۋاشىلىقتارعا كومەك بولادى. ەڭ باستىسى - ەگىندى شاشپاي-توكپەي جيناپ الۋ، - دەدى ايداربەك ساپاروۆ.

ۆەدومستۆو باسشىسىنىڭ اتاپ وتۋىنشە، بيىل استىق ەكسپورتى دەڭگەيى بىلتىرعىدان تومەن بولادى.

ويتكەنى، ەگىننىڭ ساپاسى دا، ءونىمى دە تومەن. ءبىراق، ەكسپورتتىق دەڭگەيدە ساقتاۋعا تىرىسامىز. بىلتىردان قالعان 3 ميلليون توننا استىعىمىز بار. سونى قوسقاندا ەكسپورت دەڭگەيىن ساقتاۋعا مۇمكىندىك بولادى. بۇرىن ءبيدايدىڭ 95 پايىزى ءۇشىنشى سۇرىپتى بولسا، بيىل 4,5 سۇرىپتى ءبيداي كوبەيۋى مۇمكىن. بۇل دا ەكسپورتقا اسەر ەتەدى، - دەدى ول.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى