يەمەندىك حۋسيتتەر قىزىل تەڭىزدەگى يزرايل كەمەلەرىنە تاعى دا شابۋىل جاساماق
استانا. KAZINFORM - يەمەندىك حۋسيتتەر يزرايل پورتتارىنا باراتىن كەمەلەرگە ولاردىڭ قولى جەتەتىن كەز كەلگەن ايماقتا شابۋىل جاساۋعا ۋادە بەردى. بۇل تۋرالى ياحيا ساري توبىنىڭ اسكەري وكىلى تەلەارنادا مالىمدەدى.
«ءبىز جەرورتا تەڭىزىندەگى يزرايل پورتتارىنا باراتىن كەز كەلگەن كەمەلەرگە، كەز كەلگەن ايماقتان شابۋىل جاسايمىز»، - دەپ باتىل مالىمدەمە جاسادى ساري.
ول سونداي- اق بۇل ارەكەت حابارلاما جاريالانعان ساتتەن باستاپ بىردەن ورىندالاتىنىن ايتتى.
قاراشا ايىنان بەرى يەمەننىڭ «انسار اللاح» قوزعالىسى، ياعني، حۋسيتتەر قوزعالىسى رەتىندە قىزىل تەڭىزدە، باب ءال- مانداب بۇعازىندا جانە ادەن شىعاناعىندا كەمەلەرگە قارسى بىرنەشە رەت زىمىران جانە ۇشاق شابۋىلدارىن جاسادى. حۋسيلەر ءوز شابۋىلدارىن پالەستينالىقتارمەن ىنتىماقتاستىق ناۋقانى جانە ءيزرايلدىڭ گازا سەكتورىندا جۇرگىزىپ جاتقان سوعىسىنا نارازىلىق دەپ اتايدى.
بۇل شەشىمنىڭ سەبەپتەرىنىڭ ءبىرى رەتىندە ساري قازىر 1,5 ميلليوننان استام پالەستينالىقتار پانالايتىن گازا سەكتورىنىڭ وڭتۇستىگىندەگى رافاح قالاسىندا كەلە جاتقان «اگرەسسيۆتى اسكەري وپەراتسيانى» اتادى.
يزرايل پرەمەر- ءمينيسترى بينيامين نەتانياحۋ كۇن سايىن بومبالانىپ جاتقان رافاحقا قۇرلىق اسكەرىن جىبەرەمىز دەپ قورقىتتى. ءيزرايلدىڭ قۇرلىقتاعى ىقتيمال شابۋىلى حالىقارالىق نارازىلىق تۋدىردى. كوپتەگەن مەملەكەت، سونىڭ ىشىندە امەريكا قۇراما شتاتتارى، يزرايل ۇكىمەتىن شابۋىل جاساماۋعا شاقىردى.
كەلىسسوزدەر بارىسىندا ءالى دە كۇردەلى كەدەرگىلەر بار. حاماس تۇراقتى اتىستى توقتاتۋعا، يزرايل اسكەرلەرىنىڭ گازا سەكتورىنان تولىق شىعارىلۋىنا جانە قونىس اۋدارعان پالەستينالىقتاردىڭ ۇيلەرىنە كەدەرگىسىز ورالۋىنا كەپىلدىك بەرمەيتىن كەلىسىمدى قابىلدامايتىنىن بىرنەشە رەت مالىمدەدى.
