يمانعالي تاسماعانبەتوۆ مينسكىدە ۇ ق ش ۇ قىزمەتىنىڭ قورىتىندىسى تۋرالى باياندايدى
ۇجىمدىق قاۋىپسىزدىك تۋرالى شارت ۇيىمىنىڭ (ۇ ق ش ۇ) باس حاتشىسى يمانعالي تاسماعانبەتوۆ 23-قاراشادا مينسكىدە وتەتىن ۇ ق ش ۇ ۇجىمدىق قاۋىپسىزدىك كەڭەسىنىڭ كەزەكتى سەسسياسىندا ۇيىم قىزمەتىنىڭ قورىتىندىسى تۋرالى بايانداما جاسايدى.
Kazinform-نىڭ قىرعىزستانداعى مەنشىكتى ءتىلشىسىنىڭ حابارلاۋىنشا، سەسسيا جۇمىسىنا قاتىساتىن ۇ ق ش ۇ- عا مۇشە ەلدەر باسشىلارىنىڭ قاتارىندا قىرعىز رەسپۋبليكاسىنىڭ پرەزيدەنتى سادىر جاپاروۆ بار.
قىرعىز رەسپۋبليكاسى پرەزيدەنتى اكىمشىلىگىنىڭ سىرتقى ساياسات ءبولىمىنىڭ مەڭگەرۋشىسى مۋراتبەك ازىمباكيەۆتىڭ مالىمەتىنشە، سەسسيا بەلارۋس رەسپۋبليكاسىنىڭ پرەزيدەنتى الەكساندر لۋكاشەنكونىڭ توراعالىعىمەن وتەدى. سەسسياارالىق كەزەڭدە ۇيىمنىڭ باس حاتشىسى يمانعالي تاسماعانبەتوۆ ۇ ق ش ۇ قىزمەتىنىڭ قورىتىندىسى تۋرالى بايانداما جاسايدى.
ۇجىمدىق قاۋىپسىزدىك كەڭەسىنىڭ مۇشەلەرى حالىقارالىق جانە وڭىرلىك قاۋىپسىزدىككە قاتىستى وزەكتى ماسەلەلەردى تالقىلاپ، الداعى مىندەتتەردى ايقىندايدى، سونىمەن قاتار ۇجىمدىق قاۋىپسىزدىك مۇددەسىن قامتاماسىز ەتەتىن ءبىرقاتار قۇجات قابىلدايدى. ۇ ق ش ۇ ەلدەرىنىڭ باسشىلارى ۇيىمداعى بەلارۋس ءتوراعالىعىن قورىتىندىلاپ، قازاقستان رەسپۋبليكاسى ءتوراعالىق ەتەتىن 2024 -جىلى ۇجىم قىزمەتىنىڭ نەگىزگى باعىتتارى قانداي بولاتىنى تۋرالى اقپارات تىڭدايدى.
بۇعان دەيىن حابارلاعانىمىزداي، 23-قاراشادا مينسك قالاسىندا وتەتىن ۇ ق ش ۇ ۇجىمدىق قاۋىپسىزدىك كەڭەسىنىڭ سەسسياسىنا قازاقستان پرەزيدەنتى قاسىم- جومارت توقايەۆ قاتىسادى.
اۆتور
بالنۇر قوجاگەلدى
