يلون ماسكتىڭ كومپانياسى ميىنا چيپ سالعان العاشقى ادام وي كۇشىمەن شاحمات وينادى
استانا. KAZINFORM - يلون ماسكتىڭ Neuralink كومپانياسى جۇزەگە اسىرىپ جاتقان جوبادا تاعى ءبىر جەتىستىك. ميىنا چيپ كىرىكتىرىلگەن ناۋقاس شاحمات وينادى. بۇل جايىندا X (Twitter) جەلىسىندە كاسىپكەردىڭ ءوزى حابارلادى.
ەسكە سالا كەتەيىك، يلون ماسكتىڭ Neuralink كومپانياسى بىلتىر ادامعا چيپ سالۋعا رۇقسات العان.
ءسويتىپ العاش رەت بيىل قاڭتاردا ادام ميىنا يمپلانتاتسيا جاساپ، چيپ سالعان بولاتىن.
كەشە Neuralink ءچيپى بار ناۋقاس ومىرىندە ءبىرىنشى رەت شاحمات ويناپ كوردى. ويىننىڭ ترانسلياتسياسى كومپانيانىڭ الەۋمەتتىك جەلىدەگى پاراقشالارىنان كورسەتىلدى.
29 جاستاعى نولان اربو سال بولىپ تۋعان، يىعىنان تومەن ەشتەڭە سەزبەيدى.
جاس جىگىت شاحمات ويناعاندى ۇناتادى، ءبىراق وعان مۇمكىندىگى ەشقاشان بولماعان ەدى.
ۆيدەودان ونىڭ ءچيپتىڭ كومەگىمەن كومپيۋتەر ەكرانىنداعى شاحمات تاقتاسىندا كۋرسور مەن فيگۋرالاردى وي كۇشىمەن جىلجىتقانىن كورۋگە بولادى.
ول مۇنىڭ الدىندا تىشقاننىڭ كۋرسورىن وي كۇشىمەن باسقارىپ ۇيرەنگەن بولاتىن.
بۇعان دەيىن يلون ماسك بۇل تەحنولوگيا اياق- قولىن باسقارا المايتىندار ءۇشىن جاسالىپ جاتقانىن تۇسىندىرگەن ەدى.
