يلحام اليەۆ تۇركى مەملەكەتتەرىنىڭ قورعانىس سالاسىنداعى ىنتىماقتاستىعىن نىعايتۋعا شاقىردى
اقوردادا ءوتىپ جاتقان تۇركى مەملەكەتتەرى ۇيىمىنىڭ X سامميتىندە ازەربايجان پرەزيدەنتى يلحام اليەۆ تۇركى مەملەكەتتەرىنىڭ قورعانىس سالاسىنداعى ىنتىماقتاستىعىن نىعايتۋعا ۇندەدى، دەپ حابارلايدى Kazinform.
«وكىنىشكە قاراي، قازىرگى كەزدە حالىقارالىق قۇقىق نورمالارى بۇزىلىپ جاتىر. الەمنىڭ تۇكپىر- تۇكپىرىندە قارۋلى قاقتىعىستار، قانتوگىستەر مەن سوعىستار ورىن الۋ ۇستىندە. وسى ورايدا ءار ەلدىڭ قورعانىس مۇمكىندىگى ونىڭ قاۋىپسىزدىگىنىڭ نەگىزگى كەپىلى سانالادى. سوندىقتان مەنىڭ ويىمشا، ۇيىمعا مۇشە مەملەكەتتەردىڭ قورعانىس، قاۋىپسىزدىكتى ساقتاۋ، ونەركاسىپ اياسىنداعى ىنتىماقتاستىعى نىعايتىلا ءتۇسۋى ءتيىس»، - دەدى ازەربايجان پرەزيدەنتى.
وسى رەتتە يلحام اليەۆ ارمەنيا 30 جىل بويى ازەربايجان اۋماعىن وكۋپاتسيالاپ كەلگەندىگىنە نازار اۋدارتتى.
«ول جەردە زاڭسىز «قۋىرشاق» رەجيم ورناتتى. ەتنيكالىق تازارتۋ جۇرگىزىپ، وڭىردەن ميلليوننان استام ازەرجايجاندىق اتامەكەنىنەن قۋدالاندى. قالالارىمىز بەن اۋىلدارىمىزدى جەرمەن-جەكسەن ەتتى. مادەني جانە ءدىني نىساندارىمىزدى بۇزدى. جىلدار بويى ازەربايجان بۇل قاقتىعىستى بەيبىت جولمەن شەشۋگە ۇمتىلدى. دەگەنمەن، ارمەنيا مارتەبەسىن ساقتاپ قالۋعا تىرىستى. ازەربايجان ءوزىن قورعاۋ قۇقىعىن پايدالانا وتىرىپ، ب ۇ ۇ جارعىسىنىڭ 51-بابىنا سايكەس ارمەنيانى تىزە بۇكتىردى. وسىلايشا تاريحي ادىلەتتىلىكتى جانە ءوزىنىڭ اۋماقتىق تۇتاستىعىن قالپىنا كەلتىردى»، - دەدى ول.
اۆتور
مارلان جيەمباي
