ىلبىستەر تۇران جولبارىسىنىڭ تاعدىرىن قايتالاۋى مۇمكىن - ەكولوگيا مينيسترلىگى
استانا. KAZINFORM - قازاقستاندا ىلبىستەردىڭ ازايۋىنا اڭشىلار مەن مالشىلاردان بولەك جەر قويناۋىن يگەرۋشىلەر دە «ۇلەس قوسىپ» جاتىر. ەكولوگيا جانە تابيعي رەسۋرستار مينيسترلىگىنىڭ Kazinform ساۋالىنا جولداعان جاۋابىندا وسىنداي مالىمەت ايتىلعان.
- ءىلبىس پوپۋلياتسياسىنىڭ وسۋىنە نەگىزگى كەدەرگىلەر - براكونەرلىك، مالشىلارمەن قاقتىعىستار، مەكەندەۋ ورتاسىنىڭ بۇزىلۋى، تۇياقتى جانۋارلار سانىنىڭ قىسقارۋى، ينفراقۇرىلىمدىق جوبالار، ۋربانيزاتسيا جانە پايدالى قازبالاردى ءوندىرۋ. جىل سايىن قازاقستاندا ادامنىڭ تىكەلەي ىقپالى سالدارىنان 3- 5 ءىلبىس قىرىلىپ جاتىر، - دەپ جازادى ۆەدومستۆو ماماندارى.
ۆەدومستۆوداعىلار ىلبىستەردى قورعاۋ شارالارىن جەتىلدىرمەسە، سيرەك جانۋار تۇران جولبارىستارىنىڭ تاعدىرىن قايتالاۋى مۇمكىن دەپ وتىر.
- قابىلدانىپ جاتقان شارالارعا قاراماستان، كليماتتىڭ وزگەرۋى مەن الەمدىك پوپۋلياتسيانىڭ ازايۋى سالدارىنان ءىلبىستىڭ قازاقستان اۋماعىندا جويىلۋ قاۋپى ءالى دە جوعارى. ەگەر قورعاۋ شارالارى جەتكىلىكسىز بولسا، پوپۋلياتسيا ودان ءارى ازايىپ، بۇل ءتۇردىڭ جويىلىپ كەتۋ ءقاۋپىن تۋدىرۋى مۇمكىن. مۇنداي جاعداي بۇرىن تۇران جولبارىسى سياقتى ءىرى جىرتقىشتاردىڭ جويىلۋىنا اكەلگەن بولاتىن، - دەلىنگەن رەسمي مالىمەتتە.
