ىشىمدىكتەن باس تارتۋ - حالىقتىڭ سانالى تاڭداۋى جانە ول ءوزىنىڭ ناتيجەسىن بەرىپ وتىر - باس پروكۋرور
استانا. KAZINFORM - ق ر باس پروكۋرورى بەرىك اسىلوۆ ءوزىنىڭ X الەۋمەتتىك جەلىسىندەگى پاراقشاسىندا ەلىمىزدىڭ كوپتەگەن ايماقتارىندا ىشىمدىكتەن باس تارتۋ سياقتى ارەكەتتەرگە قاتىستى جازبا جاريالاپ، ءوزىنىڭ پىكىرىن ءبىلدىردى.
- ازاماتتار جاۋاپكەرشىلىكتى ءوز موينىنا العاندا - شىنايىلىق وزگەرەدى. ەلىمىز بويىنشا جۇزدەگەن اۋىلدار ءوز ەركىمەن سپيرتتى ىشىمدىكتەردى ساتۋدان باس تارتۋدا، - دەپ جازدى.
باس پروكۋروردىڭ پىكىرىنشە، بۇل - قاراپايىم حالىقتىڭ سانالى تاڭداۋى. ءتارتىپ، دەنساۋلىق جانە بالالارىنىڭ بولاشاعى ءۇشىن جاسالعان شەشىم. ماسەلەن، ماڭعىستاۋ وبلىسىنىڭ ماڭعىستاۋ اۋدانىنداعى ءبىر اۋىلدا تۇرعىندار ىشىمدىكتى ساتۋدان ءوز ەركىمەن باس تارتىپ، بۇل تۋرالى بەينەروليكتى الەۋمەتتىك جەلىلەردە جاريالادى. وسىنداي مىسالدار اقمولا، جامبىل، قاراعاندى، اتىراۋ جانە باسقا دا وبلىستاردا كەزدەسەدى.
- ءيا، بۇل ەلدەگى بارلىق اۋىل سانىن ەسكەرسەك، تەڭىزگە تامعان تامشىداي كورىنۋى مۇمكىن. ءبىراق باستىسى - جاعدايدىڭ وڭ سەرپىنى بار. مۇنداي ەلدى مەكەندەر سانى ارتىپ كەلەدى. ادامدار سەنىم مەن تۇراقتىلىقتى، تىنىشتىقتى جوعارى باعالاپ، ءبىر-بىرىنە ۇلگى بولا باستادى، - دەيدى بەرىك اسىلوۆ.
سونداي-اق ول باستامانىڭ اۋىل اقساقالدارى مەن قوعامدىق كەڭەستەردەن شىعىپ، پروكۋراتۋرا، پوليتسيا جانە جەرگىلىكتى اكىمدىكتەردىڭ تاراپىنان ۇيلەستىرۋ، الدىن الۋ جانە قاۋىپسىزدىك قامتاماسىز ەتىلگەنىن اتاپ ءوتتى.
- اۋىل كاسىپكەرلەرى ەرەكشە العىسقا لايىق. جەرلەستەرىنىڭ ءۇنىن ەستىپ، ولار دۇكەن سورەلەرىنەن ىشىمدىكتى ءوز ەركىمەن الىپ تاستادى. كۇماندانعانمەن، تابىستارى ازايعان جوق. كەرىسىنشە، اۋىل تۇرعىندارى ىشىمدىكتىڭ ورنىنا بالالارعا پايدالى ازىق-تۇلىكتەردى ءجيى ساتىپ الا باستادى. ناتيجەلەر وزدىگىنەن كورىنىپ تۇر: كەيبىر اۋىلداردا قىلمىس مۇلدە جويىلدى، تۇرمىستىق جانجالدار توقتادى، جاستار سپورت پەن سانالى ءومىر سالتىن تاڭداي باستادى. بۇل - «زاڭ جانە ءتارتىپ» قاعيداتىنىڭ ومىردەگى ناقتى كورىنىسى. ءتارتىپ قورقىنىشپەن ەمەس - سەنىممەن، جازا ارقىلى ەمەس - سانالى تاڭداۋمەن ورنايدى. «زاڭ مەن ءتارتىپ - كەمەل دەموكراتيانىڭ ىرگەتاسى ءارى قۇقىقتىق مەملەكەتتىڭ نەگىزى»، - دەپ مەملەكەت باسشىسى اتاپ وتكەن ەدى. ءبىز بولاشاققا دەگەن قامقورلىق، قوعامدىق كەلىسىم جانە زاڭعا قۇرمەتكە نەگىزدەلگەن ءاربىر باستامانى قولدايمىز، - دەدى ۆەدومستۆو باسشىسى.
ءسوز سوڭىندا ول رەسمي ستاتيستيكا بويىنشا بيىلعى العاشقى ءۇش ايدا الكوگولدىك ماس كۇيىندە جاسالعان قىلمىستار سانى ازايعانىن ءمالىم ەتتى.
وسىعان دەيىن تۇركىستان وبلىسىندا ىشىمدىكتەن باس تارتقان اۋىلدار سانى 60 تان اسقانىن جازدىق.
سونداي-اق اقتوبە وبلىسىندا ىشىمدىكتەن باس تارتقان 33 اۋىل بار ەكەنى جازىلدى.
اۆتور
ايدار وسپاناليەۆ
