ىشكى ىستەر مينيسترلىگى قۋاندىق بيشىمبايەۆتىڭ ىسىنە قاتىستى تۇسىنىك بەردى

بۇگىن سەناتتىڭ جالپى وتىرىسىنان كەيىن تىلشىلەر ءمينيستردىڭ ورىنباسارىنان ەكس-شەنەۋنىك بيشىمبايەۆ ىسىندە نەگە تەرگەۋشىلەر قايتا-قايتا اۋىسىپ جاتقانىن سۇرادى.

ءوز كەزەگىندە مارات قوجايەۆ تەرگەۋ امالدارى بارىسىندا ءىس دەرەكتەرى ازىرگە جاريالاۋعا جاتپايتىنىن ايتتى.

«ءبىرىنشى كۇنى وقيعا ورنىنا كەزەكشى تەرگەۋ توبى جىبەرىلەدى. ەرتەڭىندە تەرگەۋ ءىسى باسقا مامانعا تاپسىرىلۋى مۇمكىن. سوندىقتان وسىنداي مالىمەت تاراپ جاتقان شىعار. اتاپ ايتقاندا، ءىس ارنايى ءبىر ادامعا تاپسىرىلادى. ونىڭ جانىندا تاعى تەرگەۋشىلەر بولادى. قىلمىستىق ءىستى جالعىز ءبىر ادام تەرگەمەيدى، توپ بولىپ تەرگەۋى مۇمكىن»، - دەدى ءمينيستردىڭ ءبىرىنشى ورىنباسارى.

ونىڭ ايتۋىنشا، وسى ءىس بويىنشا سوت-مەديتسينالىق ساراپتاماسى ادەتتە ءبىر اي جۇرگىزىلەدى.

سونىمەن قاتار تىلشىلەر بيشىمبايەۆتىڭ قىلمىسىن جاسىرعان تۋىسىنا قاتىستى قانداي شارا قولدانىلاتىنىن سۇرادى.

«بىرنەشە ادامنىڭ ۇستىنەن قىلمىستىق ءىس قوزعالعان. تەرگەۋ امالدارى جالعاسىپ جاتىر. سونىڭ ناتيجەسىندە كىم قانداي جاۋاپقا تارتىلاتىنى انىقتالادى. زاڭ تالابى بويىنشا باسقا مالىمەتتى ايتا المايمىن»، - دەدى مارات قوجايەۆ.

ايتا كەتەيىك، 9-قاراشادا استاناداعى باۋ مەيرامحاناسىندا 20:30 شاماسىندا بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ ءوزىنىڭ جۇبايىن سوققىعا جىققان. ايەل جەدەل جاردەم كەلگەنشە جان تاپسىردى.

ىشكى ىستەر مينيسترلىگى استانا مەيرامحاناسىنداعى كىسى ءولىمى بويىنشا قۋاندىق بيشىمبايەۆتىڭ ۇستالعانىن راستادى.

استانا قالاسىنداعى مەيرامحانالاردىڭ بىرىندە ايەلدىڭ قازا تابۋ فاكتىسى بويىنشا ەلوردا پوليتسيا دەپارتامەنتى قازاقستان رەسپۋبليكاسى ق ك-نىڭ 99-بابى 1-بولىگى بويىنشا تەرگەۋ جۇمىسىن باستادى.

11-قاراشادا استانا قالاسىنىڭ مامانداندىرىلعان اۋدانارالىق تەرگەۋ سوتى كۇدىكتى قۋاندىق بيشىمبايەۆقا قاتىستى 2 اي مەرزىمگە قاماۋعا الۋ تۇرىندەگى بۇلتارتپاۋ شاراسىن سانكتسيالادى.

بۇرىنعى ءمينيستردىڭ ءىسى بويىنشا كىسى ءولىمى تىركەلگەن «گاسترو-ورتالىق» مەيرامحاناسىنىڭ ديرەكتورى ۇستالدى.

اۆتور

رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى