ۇيدە ەسىرتكى تۇتىنعاندارعا جاۋاپكەرشىلىك ەنگىزىلمەك
ەلىمىزدىڭ ىشكى ىستەر مينيسترلىگى قوعامدىق ورىننان تىس جەردە دە ەسىرتكى تۇتىنعانى ءۇشىن اكىمشىلىك جاۋاپكەرشىلىك ەنگىزۋ ماسەلەسىن قاراستىرىپ جاتىر، دەپ حابارلايدى Kazinform.
«مەديتسينالىق ماقساتتان بولەك ەسىرتكى تۇتىنۋعا ءشۇباسىز ءارى تولىق تىيىمدى قامتاماسىز ەتۋ ءۇشىن ولاردى قوعامدىق ورىننان تىس جەردە دە تۇتىنۋعا اكىمشىلىك جاۋاپكەرشىلىك ەنگىزۋ ماسەلەسى تالقىلانىپ جاتىر»، - دەلىنگەن اگەنتتىكتىڭ رەسمي ساۋالىنا مينيسترلىك بەرگەن جاۋاپتا.
بۇل باستاما ماقۇلدانعان جاعدايدا ەسكىرتكىنى ۇيدە، كولىكتە نەمەسە كوڭىل كوتەرەتىن ورىنداردا مەديتسينالىق ماقساتتان بولەك تۇتىنعان كەزدە اكىمشىلىك زاڭمەن جازاعا تارتىلادى.
ءى ءى م قولدانىستاعى زاڭنامادا ەسىرتكىنى قوعامدىق ورىندا تۇتىنعانى ءۇشىن قىلمىستىق جاۋاپكەرشىلىك كوزدەلگەنىن اتاپ وتەدى. مۇنداي تەرىس قىلىق جاساعاندار ايىپپۇل ارقالايدى نەمەسە قوعامدىق جۇمىسقا جەگىلەدى.
مۇنان بولەك، قازىرگى ۋاقىتتا 2023-2025-جىلدارعا ارنالعان ناشاقورلىقپەن جانە ەسىرتكى بيزنەسىمەن كۇرەس جونىندەگى كەشەندى جوسپاردى جۇزەگە اسىرۋ اياسىندا مينيسترلىك بەيىندى دەپارتامەنتتى قايتا ۇيىمداستىرۋ جۇمىسىن جۇرگىزىپ جاتىر. اتالعان مەكەمەگە ەسىرتكى اينالىمىن باقىلاۋ جانە وسى سالاداعى ۆەدومستۆوارالىق ۇيلەستىرۋ قىزمەتتەرىن جۇزەگە اسىرۋ ءۇشىن جان-جاقتى وكىلەتتىك بەرىلمەك.
