ۇيات بولادى دەپ ون جىل شىداپ، مۇگەدەك بولدىم - داعدارىس ورتالىعىنداعى ايەل

كوپبالالى انالار سانى باسىم - ورتالىق قىزمەتكەرى

«اقتوبە قالالىق تۇرمىستىق زورلىق-زومبىلىق قۇرباندارىنا ارنالعان ورتالىعى» كوممۋنالدىق-مەملەكەتتىك مەكەمەسىنىڭ مەكەنجايى بوگدە ادامعا بەلگىسىز. بۇل جەردە تەك انا مەن بالا قامقورلىققا الىنعان. وزبىر كۇيەۋدىڭ كەلىپ قورقىتىپ، قىسىم كورسەتۋى مۇمكىن دەپ بار مالىمەت قۇپيا ۇستالادى. ءتىپتى كىرىپ-شىعۋشىلاردىڭ ءبارىنىڭ اتى-ءجونى جازىلىپ، الدىن الا ەسكەرتىلەدى. ال كومەك سۇراۋشىلار قالاداعى «باقىتتى وتباسى» ورتالىعىنا بارادى، كەيدە پوليتسيا ارقىلى جەتكىزىلەدى.

- ورتالىق 50 توسەك-ورىنعا شاقتالعان. سونىڭ ىشىنە اناسى مەن بالاسى كىرەدى. بۇل جەردە 8 ارناۋلى الەۋمەتتىك قىزمەت ءتۇرىن كورسەتەمىز. الەۋمەتتىك ماماندار، ەرەسەكتەرگە جانە بالالارعا ارنالعان پسيحولوگتار جۇمىس ىستەيدى. سونىمەن قاتار ەكى تاربيەشى بار. ىشكە كەلىپ تۇسەتىن ايەلدەردىڭ كوبىنىڭ كۇيەۋى ناشاقور، ىشىمدىككە اۋەس. باسىم بولىگى ءتۇن ىشىندە ۇيدەن قۋىپ جىبەرەدى. ول ادامدار 102 گە حابارلاسىپ، پوليتسيا بىزگە اكەلەدى. سونىمەن بىرگە «باقىتتى وتباسى» ورتالىعىنا دا بارىپ، كومەك سۇرايتىندار بار. زورلىق-زومبىلىق قۇرباندارى دەپ تانىلعان جاعدايدا ءبىز وزىمىزگە قابىلدايمىز. 2023 -جىلى 194 قىزمەت الۋشى كەلدى. ونىڭ 64 ى ايەل ادام، 130 ى بالا، - دەدى داعدارىس ورتالىعىنىڭ الەۋمەتتىك ماسەلەلەر بويىنشا ءبولىم باسشىسى ايپان وتەجان.

ەرەجە بويىنشا داعدارىس ورتالىعىنا جەتكىزىلگەن انا مەن بالا الدىمەن وقشاۋلاۋ بولمەسىندە بولادى. سول جەردە دارىگەرلەر تەكسەرىپ، رەنتگەنگە تۇسىرەدى، قاجەت بولسا ءتۇرلى ەم جۇرگىزەدى. كەيىن جاتىن ورنى مەن گيگيەنالىق زاتتار بەرىلەدى. قاجەت بولسا كيىم دە تابىلادى. ەس جيعان سوڭ بالانى بالاباقشا مەن مەكتەپكە جىبەرىپ، اناسى جۇمىسقا ورنالاسادى. تالاپ وسى.

- قازىر ءۇش جاسقا دەيىنگى بالالاردى سابيلەر ۇيىنە تاڭەرتەڭ اپارىپ، كەشكە الىپ كەتۋ قاراستىرىلعان. ءبىراق ۇشتەن اسقان بالانى ورنالاستىرۋ جاعى قيىن. سوندىقتان مەملەكەتتىك مەكتەپكە دەيىنگى مەكەمەگە ورنالاستىرۋداعى جەڭىلدىكتەر جايىن سۇراستىرىپ ءجۇرمىز. ىشكى ءتارتىپ بويىنشا اركىم ءوز بولمەسىن جينايدى. اس بولمەدە كەزەكشىلىك بار.

سىرتقا شىعاتىن ۋاقىتتا شىعۋ-كەلۋ ۋاقىتى كورسەتىلەدى، رۇقساتناما بەرىلەدى. مۇندا تاعدىر ايداپ كەلەتىندەردى ءبولىپ-جارا المايمىن. ءبىراق باسىم بولىگى كوپبالالى انا. كەيدە كەشىرىپ، ۇيىنە ورالادى. الايدا قايتا اينالىپ كەلىپ، كومەك سۇرايدى. ەگەر اجىراسۋعا شەشىم قابىلداسا، زاڭگەرلەر كومەكتەسەدى. التى ايدا الداعى ءومىرى ءۇشىن اقشا جيناپ، جۇمىس ىستەيدى. كەيىن ورتالىقتان شىعارىلادى، - دەدى ايپان وتەجان.

«ۇيات بولادى» دەپ ءجۇرىپ، بالالارىمنىڭ ۇيقىسى بۇزىلدى - قىزمەت الۋشى

وتباسىندا زورلىق-زومبىلىق كورىپ، تاياق جەگەن ايەلدەر ءالى كۇنگە دەيىن اتى-ءجونىن جاسىرادى. ولار ۇيالادى، كەيدە قورقادى.

- وسىندا قازان ايىندا كەلدىم. قازىرگى كەزدە ءتورت ايعا جۋىق ۋاقىت بولدى. بۇل جەرگە كەلگەندە جاعدايىم اۋىر بولدى. ۇرىپ-سوققاننان باسىم جارالانىپ، بۇعان دەيىن وتا جاساتقان اداممىن. قازىر ءۇشىنشى توپ مۇگەدەگىمىن، تالما اۋرۋىنا دۋشار بولدىم. جولداسىمدا توقتاۋ بولمادى. سوڭعى كەزدەرى بالالارىم ۇيىقىسىنان شوشىپ ويانىپ، «ماما، ۇرماسىنشى» دەپ جىلايتىن بولدى. سودان ويلانىپ، كەتۋگە شەشىم قابىلدادىم. بالالارىمدى جيىپ، ءوز ويىمدى ايتتىم. ولاردىڭ ءبارى مەنى تاڭداپ، وزىممەن ەرە كەتتى، - دەدى 35 جاستاعى اقتوبەلىك.

ول ءۇش ەر بالانى ومىرگە اكەلگەن. قازىر كۇيەۋىنىڭ بۇرىنعى ايەلىنەن قالعان قىزدى باۋىرىنا باسىپ، كوپبالالى انا اتانىپ وتىر. ورتالىققا دا ءتورت بالاسىمەن قابىلداندى.

- قىز بالاعا «ۇيات بولادى» دەپ كوپ ايتادى. 10 جىل بويى ۇرىپ-سوقسا دا شىدادىم. اكەم جەرگە قاراماسىن، سىڭلىلەرىم رەنجىمەسىن دەپ ءجۇردىم. وتباسىندا مەن جانە ءتورت ءسىڭلىم بولدى. ولار ۇياتقا قالماسىن دەدىم. شىدامنىڭ شەگى بار ەكەنىن ءۇش جىل بۇرىن ءبىلىپ، ورتالىققا كەلدىم. ول كەزدە ەنەم كەلىپ، قايتا قوستى. تاعى ءۇش جىل شىداعانىممەن، ەشتەڭە وزگەرمەدى. ەرتە شەشىم قابىلداپ، ءوزىمدى قۇرمەتتەۋىم كەرەك ەدى. اكەمە قىز، ايەل بوپ شارشاعانىمدى، بالاعا انا عانا بولاتىنىمدى ايتتىم. مۇندا كوپ مۇمكىندىك بەرىلدى، ۋايىمسىز كۇلە الاسىڭ، قورىقپايسىڭ. بالالارىمنىڭ ۇيقىسى تىنىش. ءتۇرلى ۇيىرمەگە قاتىسادى. بارىنە العىس ايتامىن. پەداگوگتەرى وتە سابىرلى. ادام پسيحولوگياسىن دا جاقسى مەڭگەرگەن. بار جاعدايىن كوزىنە قاراپ بىلەدى. ەكى اۋىز جىلى ءسوزى جان تەبىرەنتەدى، - دەدى قىزمەت الۋشى.

وزگە ەلدەن قونىس اۋدارعان قازاق قىزى قازىرگى كەزدە ەدەن جۋۋشى بولىپ جۇمىس ىستەيدى. ازىرگە ءتورت ساعاتتىق ەڭبەگىنىڭ جالاقىسى 60 مىڭ تەڭگە. ءارى اجىراسۋ ءۇشىن سوتقا ارىز جازىپ قالدىردى.

- بۇدان كەيىن ومىرىمدە بالالارىمدى اياققا تۇرعىزۋىم كەرەك. پاتەر جالدايمىن. قازىر جۇمىستا ءجۇرمىن. بالالارىمدى قور قىلمايمىن، ۇلگى تۇتاتىن ازامات قىلامىن. ولارمەن ءجيى سىرلاسامىن. سەبەبى جىلۋلىقتى سىرتتان ەمەس، مەنەن العانىن قالايمىن. ادامعا ەكى اۋىز جىلى ءسوز ايتساڭ، جانىڭدى ەمدەيدى. قازىر قاراپ وتىرسام، ۇيات بولادى دەپ بىردە-ءبىر رەت پوليتسياعا ارىز تۇسىرمەپپىن. ال ەندى تەك العا ۇمىتپەن قارايمىن، - دەدى ول.

اۆتور

التىناي ساعىندىقوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى