ۇيالى بايلانىس وپەراتورلارىنىڭ تاريفتى نەگىزسىز كوتەرۋ ارەكەتتەرى قارالىپ جاتىر

- قازىر اگەنتتىك ۇيالى بايلانىس وپەراتورلارىنىڭ 2024-جىلى جانە 2025-جىلدىڭ باسىنان باستاپ باسەكەلەستىكتى قورعاۋ سالاسىنداعى زاڭنامانىڭ بۇزىلۋىنان باعانىڭ وسۋىنە اكەلەتىن ءىس-ارەكەتتەردى قاراپ جاتىر. اگەنتتىك وپەراتورلاردىڭ تاريف باعاسىن نەگىزسىز كوتەرۋ فاكتىلەرىن انىقتاعان كەزدە تەرگەۋ ءراسىمى تاعايىندالادى. وسى ورايدا، تاريفتەردى كوتەرۋدىڭ نەگىزى تەك تەرگەۋ شەڭبەرىندە تەكسەرىلۋى مۇمكىن. تەرگەۋ - باسەكەلەستىكتى قورعاۋ سالاسىنداعى زاڭنامانى بۇزۋدى راستايتىن نەمەسە جوققا شىعاراتىن ناقتى دەرەكتەردى جيناۋعا باعىتتالعان مونوپولياعا قارسى ورگاننىڭ ءىس-شاراسى، - دەلىنگەن رەسمي ساۋال جاۋابىندا.

سونداي-اق باسەكەلەستىكتى قورعاۋ جانە دامىتۋ اگەنتتىگى «كسەل» ا ق، (Activ)، «موبايل تەلەكوم-سەرۆيس» ج ش س (تەلە2/التەل) جانە «كار-تەل» ج ش س- نە (Beeline) قاتىستى بۇعان دەيىن باستالعان تاريف باعاسىن ءبىر مەزگىلدە كوتەرۋ، ياعني باسەكەلەستىككە قارسى كەلىسىلگەن ءىس-قيمىل بەلگىلەرى بويىنشا تەرگەۋ امالدارى اتالعان وپەراتورلاردىڭ سوت تارتىبىمەن شاعىمدانۋىنا بايلانىستى كۇشىن جويعانىن ءمالىم ەتتى.

- زاڭ بۇزۋشىلىق فاكتىسى قازاقستان رەسپۋبليكاسىنىڭ كاسىپكەرلىك كودەكسىنە سايكەس جۇرگىزىلەتىن تەرگەۋ قورىتىندىلارى بويىنشا عانا انىقتالۋى مۇمكىن، - دەيدى اگەنتتىكتەن.

بايلانىس وپەراتورلارىنا قانداي جاۋاپكەرشىلىك كوزدەلگەن

قازاقستان رەسپۋبليكاسى «اكىمشىلىك قۇقىق بۇزۋشىلىق تۋرالى» كودەكسىنىڭ 159- بابىنا سايكەس، سۋبەكتىلەردىڭ باسەكەلەستىككە قارسى كەلىسىلگەن ءىس-ارەكەتتەرى، مونوپوليالىق جولمەن جوعارى باعانى بەلگىلەۋ، باعانى ۇستاپ ۇستەمدىك كورسەتۋ بايلانىس وپەراتورىنىڭ مونوپوليالىق كىرىسىن تاركىلەي وتىرىپ، ايىپپۇلعا الىپ كەلەدى.

سونىمەن قاتار، اتالعان كودەكستىڭ 226-بابىنىڭ 2-تارماعىنا سايكەس (مونوپولياعا قارسى دەن قويۋ شارالارى)، نورما بۇزىلعان جاعدايدا سۋبەكتىلەر (بايلانىس وپەراتورلارى):

1) مونوپولياعا قارسى ورگاننىڭ نۇسقامالارىنا سايكەس زاڭ بۇزۋشىلىقتى توقتاتۋعا جانە ونىڭ سالدارىن جويۋعا، نۇسقامادا كوزدەلگەن وزگە دە ارەكەتتەردى ورىنداۋعا مىندەتتى؛

2) كەلتىرىلگەن زالالدى قازاقستان رەسپۋبليكاسىنىڭ ازاماتتىق زاڭناماسىنا سايكەس وتەۋگە مىندەتتى؛

3) قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىندە بەلگىلەنگەن تارتىپپەن مونوپولياعا قارسى ورگاننىڭ اكىمشىلىك جازا قولدانۋ تۋرالى قاۋلىسىن ورىنداۋعا مىندەتتى.

ەسكە سالا كەتەيىك، بىلتىر جىل سوڭىندا ەلىمىزدەگى ۇيالى بايلانىس قىزمەتىنىڭ قۇنىنا شولۋ جاساعان ەدىك.

ايتا كەتسەك، بىلتىر قاراشاداعى ستاتيستيكا بويىنشا ەلىمىزدە 26 ميلليون ۇيالى بايلانىس ابونەنتى تىركەلگەن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى