ۆەيپ پەن كاليانعا تىيىم سالۋ كولەڭكەلى نارىقتىڭ وسۋىنە الىپ كەلدى – ۇ ك پ وكىلى
استانا. KAZINFORM - «اتامەكەن» ۇلتتىق كاسىپكەرلەر پالاتاسىنىڭ اگروونەركاسىپ كەشەنى جانە تاماق ونەركاسىبى دەپارتامەنتىنىڭ باسقارۋشى ديرەكتورى ەردەن ناۋرىزبەكوۆ ەلىمىزدە ۆەيپ ساتۋعا جانە كاليان تارتۋعا تىيىم سالۋدىڭ سالدارى تۋرالى ايتتى.
ونىڭ ايتۋىنشا، تىيىم سالۋ شاراسى كەرى اسەر ەتەدى جانە جاعدايدى ۋشىقتىرا تۇسەدى.
- ۆەيپ ساتۋعا تىيىم سالىندى، ءبىراق تۇتىنۋعا تىيىم سالىنباعان، سوندىقتان نارىقتا ءالى دە بار، ياعني تىيىم ۇستىنە تىيىم بولىپ تۇر. الدىمەن كامەلەتكە تولماعاندارعا ساتۋعا تىيىم سالىندى، كەيىن ەرەسەكتەرگە دە ساتۋعا تىيىم سالۋ تۋرالى شەشىم قابىلداندى. دەسە دە دەنساۋلىق كودەكسىنىڭ 110-بابى بويىنشا بالالارعا عانا تىيىم سالىنعان. تەرريتورياسى اۋقىمدى ەلىمىزگە تىيىم سالىنعان تاۋارلاردىڭ اعىنىن تولىق باقىلاۋ مۇمكىن ەمەستىگىن باسىندا-اق ەسكەرتكەن ەدىك. ناتيجەسىندە مەملەكەتتىك ورگاندارعا جۇكتەمە ارتىپ، زاڭسىز نارىق دامۋىن جالعاسۋدا، - دەدى ەردەن ناۋرىزبەكوۆ ەلوردادا «تەمەكى جانە نيكوتين ونىمدەرىنىڭ كونترابانداسى جانە كونترافاكتىسى: ە ا ە و ەكونوميكاسى مەن ۇلتتىق قاۋىپسىزدىگىنە قاتەر» تاقىرىبىندا وتكەن باسپا ءسوز ءماسليحاتىندا.
سونداي-اق ۇلتتىق كاسىپكەرلەر پالاتاسىنىڭ وكىلى قوعامدىق تاماقتانۋ ورىندارىندا كاليان شەگۋگە تىيىم سالۋ ماسەلەسىنە توقتالدى.
- دەنساۋلىق كودەكسىندە مەيرامحانا، ءدامحانا جانە لاۋندج-باردا كاليان تارتۋعا تىيىم سالىنعان. ءبىراق ءۇي جاعدايىندا پايدالانۋعا بولادى جانە كاليان قوسپالارىن اكەلۋ شەكتەۋ جوق. قوعامدىق تاماقتانۋ ورىندارىندا كاليانعا تىيىم سالۋدىڭ ناتيجەسىندە بۇل بيزنەستىڭ ءبىر بولىگى كولەڭكەگە كەتتى، قالعانى تولىعىمەن جابىلدى. بۇل شامادان تىس رەتتەۋدىڭ كەرى اسەر ەتەتىنىن تاعى دا راستايدى، - دەدى ول.
بيزنەستى قورعاۋشىنىڭ مالىمدەۋىنشە، تىيىم نارىقتا تەڭ ەمەس جاعدايدى تۋعىزادى.
- زاڭدى ساقتاپ، ءونىمدى تاڭبالاعان، اكسيز تولەگەن جانە جاس شەكتەۋىن باقىلاۋدا ۇستاپ كاسىپ ەتكەن كومپانيالار جابىلۋعا ءماجبۇر بولدى. ال تالاپتارعا باعىنبايتىن زاڭسىز بيزنەس جۇمىسىن جالعاستىرىپ جاتىر. ولاردىڭ نارىقتا باسەكەلەستەرى جوق، ال بۇل الاڭداتارلىق جاعداي. ءبىز سالانى باقىلاۋدى جوعالتتىق، - دەپ ءتۇسىندىردى ە. ناۋرىزبەكوۆ.
بۇگىندە تىيىم سالۋدان زارداپ شەككەن كاسىپكەرلەر ۇلتتىق پالاتادان كومەك سۇراۋدى جالعاستىرۋدا.
- كوپتەگەن كاسىپكەر ماسەلەنى رەتتەۋدىڭ بالاما تاسىلدەرىن ۇسىندى. مىسالى، قوعامدىق تاماقتانۋ ورنىندا (ءدامحانا، مەيرامحانا، لاۋندج- بار) كاليان تارتۋعا جەكە بولمە قاراستىرۋ، بولمەگە جەلدەتۋ جۇيەسىن قوسۋ جانە سانيتارلىق تالاپتاردى قاتاڭ ساقتاۋ سەكىلدى. ادامدار ءبارىبىر امالىن تاۋىپ، زاڭسىز ارنالاردان الىپ تۇتىنىپ جاتىر. شىعىندى ازايتۋ ءۇشىن تەپە-تەڭدىكتى ساقتاۋىمىز كەرەك، - دەپ قورىتىندىلادى اتامەكەن وكىلى.
ايتا كەتەيىك، بيىل ناۋرىزدا ەلىمىزدە كاليانعا ايىپپۇل سوماسى وسەتىن بولدى.
سونىمەن قاتار پوليتسيا قوعامدىق ورىنداردا كاليان شەككەندەردى جازاعا تارتىپ جاتقانى تۋرالى حابارلاعان ەدىك.
بۇعان دەيىن ەلىمىز تەمەكى كونترابانداسى سالدارىنان جىل سايىن 32 ميلليارد تەڭگە جوعالتاتىنى ايتىلدى.
