وزبەكتىڭ وليمپيادا چەمپيوندارى قازاق بوكسشىلارىنا قارسى شارشى الاڭعا شىقپايتىن بولدى
استانا. KAZINFORM - بۇگىن بولگاريا استاناسى سوفيادا بوكستان ءداستۇرلى «ستراندجا كۋبوگىنىڭ» الاۋى تۇتاندى. جەرەبە قورىتىندىسىنا سايكەس بۇگىن قازاقستاندىق الەم جانە ازيا چەمپيونى تورەحان سابىرحان (67 كەلى) مەن وزبەكستاندىق وليمپيادا چەمپيونى اسادحۋجا مۋيدينحۋجايەۆ جۇدىرىقتاساۋى كەرەك ەدى. وكىنىشكە قاراي اتالعان جەكپە-جەك وتپەي قالدى.
سونداي-اق 60 كەلىدە ونەر كورسەتەتىن سەرىك تەمىرجانوۆتىڭ العاشقى اينالىمداعى قارسىلاسى تاعى ءبىر وزبەكستاننىڭ وليمپيادا چەمپيونى ابدۋماليك حالوكوۆ اراسىنداعى ايقاس وتپەيتىنى بەلگىلى بولدى.
بۇل تۋرالى boxinguzbekistan_official قوسىمشاسىندا حابارلاعاندى.
- ءبىرىنشى كۇنگى جەكپە-جەكتەر تىزىمىندە وليمپيادا چەمپيونى ابدۋمالىك حالوقوۆتىڭ كەزدەسۋى بار ەدى. الايدا ونىڭ كاسىبي جەكپە-جەگىنىڭ ۋاقىتى ەرتەرەك وزگەرتىلگەندىكتەن، يسپانياعا ۇشىپ كەتەتىن بولدى. دەمەك ول بۇگىن «Strandja» تۋرنيرىندە رينگكە شىعا المايدى. تاعى ءبىر چەمپيونىمىز اسادحوجا مۋيدينحوجايەۆ تە بۇگىن بولگاريادا جەكپە-جەك وتكىزۋى كەرەك ەدى. ءبىراق ول تۋرنير الدىندا العان جاراقاتىنان تولىق ايىقپاعاندىقتان، كەزدەسۋگە قاتىسا المايدى، - دەلىنگەن حابارلامادا.
ەستەرىڭىزگە سالا كەتەيىك، وسىعان دەيىن قازاقستاندىق بوكسشىلاردىڭ قارسىلاستارى انىقتالعانىن جازعان بولاتىنبىز.
اۆتور كۇنسۇلتان وتارباي
