وزبەكستاندا تاۋلىك بويى جۇمىس ىستەيتىن تۋريستىك ورتالىقتار قۇرىلادى

وزبەكستان باسشىسىنىڭ باسپا ءسوز قىزمەتىنەن ءمالىم ەتكەندەي، شاۆكات ميرزيەيەۆ تۋريستەردى تارتۋ باعىتىندا قولعا الىنىپ جاتقان جوبالارمەن تانىستى.

ماسەلەن، ساياحاتتاپ كەلگەندەر ءۇشىن ەڭ تارتىمدى سانالاتىن 12 اۋدان مەن قالادا تۋريستىك ورتالىقتار قۇرۋ جوسپارلانىپ وتىر. ونداعى مەيرامحانا، كافە، ساۋىقتىرۋ ورىندارى مەن باسسەيندەر تاۋلىك بويى ۇزدىكسىز جۇمىس ىستەمەك.

كۋرورتتىق ايماقتار مەن ويىن-ساۋىق كەشەندەرىندە حالىقارالىق برەندتەر، جىبەك ماتالار، كادەسىيلار، زەرگەرلىك بۇيىمدار مەن التىن قۇيمالار دۇكەنى اشىلادى. ول ءۇشىن 2027-جىلدىڭ 1- قاڭتارىنا دەيىن تۋريستىك ورتالىقتارداعى كاسىپكەرلەر ءۇشىن جەر مەن مۇلىككە سالىناتىن سالىق مولشەرلەمەسى %90 عا تومەندەيدى، ال 2026-جىلدىڭ 1- ناۋرىزىنا دەيىن ولار زەرگەرلىك جانە التىن بۇيىمداردى وندىرۋگە قاجەتتى جابدىقتار مەن تەحنولوگيالارعا كەدەندىك باج سالىعىنان بوساتىلادى.

بيىلدان باستاپ «وزبەكستاندا تاعى ءبىر كۇن» باعدارلاماسى ىسكە اسىرىلادى. ول وبلىستاردىڭ تۋريستىك وبەكتىلەرى جانە اۋدان مەن قالالار اراسىنداعى وڭىرلىك ساياحات باعىتتارىن بايلانىستىراتىن رەسپۋبليكالىق تۋريستىك مارشۋرۋتتاردى قۇرۋدى كوزدەيدى.

سونىمەن قاتار، «ءار ماۋسىمداعى ساياحات» باعدارلاماسىن قولعا الۋ قاراستىرىلعان. ونىڭ شەڭبەرىندە كوكتەم جانە كۇزدە ەكولوگيالىق، ەكسترەمالدى، مەديتسينالىق جانە ساۋىقتىرۋ تۋريزمىن، جازدا سۋ جانە كۋرورتتىق، قىس مەزگىلىندە شاڭعى تۋريزمىن ىلگەرىلەتۋ جونىندەگى شارالار ىسكە اسادى. تۋريستىك ماۋسىمداردىڭ اشىلۋىنا وراي فەستيۆالدار وتەدى.

وزبەكستاننىڭ تۋريستىك الەۋەتىن شەتەلدە ىلگەرىلەتۋ ماقساتىندا «تۋريزم ەلشىلەرى» ينستيتۋتى ەنگىزىلەدى. ەكى جىلدا ءبىر رەت مامىر ايىندا 2 ميلليون دوللار جۇلدە قورىمەن «وزبەكستاننىڭ جىبەك ماتالارى» حالىقارالىق ءسان اپتالىعى وتەدى.

وزبەكستان باسشىسى شاۆكات ميرزيەيەۆ اتالعان ۇسىنىستاردى ماقۇلداپ، ەكوتۋريزمدى ودان ءارى دامىتۋ، مۇگەدەك ادامداردىڭ ساياحاتتاۋى ءۇشىن قاجەتتى جاعداي جاساۋ بويىنشا ءبىرقاتار تاپسىرما بەردى.

ەسكە سالا كەتەيىك، بىلتىر وزبەكستاندا تۋريستىك اعىننىڭ ورتاشا جىلدىق ءوسىمى %20 دان استى. 2023-جىلى قاڭتار-قاراشا ايلارى ارالىعىندا ەلگە 6 ميلليون 134 مىڭ شەتەلدىك تۋريست كەلگەن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى